২০০০ মেগাৱাট নামনি সোৱণশিৰি জলবিদ্যুৎ প্ৰকল্পৰ নিম্নমুখী প্ৰভাৱ হ্ৰাস কৰিবলৈ ২০১২ৰ জুলাইত যুটীয়া পৰিচালনা সমিতিৰ পৰামৰ্শ অনুসৰি ভাৰত চৰকাৰে ৪৭০ কোটি টকাৰ এক নামনি উন্নয়ন পেকেজ (downstream development package) অনুমোদন কৰিছিল যাৰ ভিতৰত আছে ১৪৫কোটি টকা সোৱণশিৰি নদীৰ বান্ধৰ পৰা ৩০কিলোমিটাৰ নামনিলৈকে নদীপাৰ সুৰক্ষা আৰু ভূমিস্খলন নিয়ন্ত্ৰণ, নামনি অঞ্চলসমূহত উন্নয়নমূলক কামৰ বাবে ৩২০ কোটি টকা আৰু সামাজিক সজাগতা আৰু গণজাগৰণ কাৰ্যসূচীৰ বাবে ৫কোটি টকা।
ধেমাজি আৰু লখিমপুৰ জিলাত বহনক্ষম জীৱিকাৰ হস্তক্ষেপৰ (sustainable livelihood interventions) ৰূপায়ণৰ বাবে এনএইচপিচি লিমিটেডে পৰামৰ্শদাতা হিচাপে নিযুক্ত কৰা গুজৰাটৰ গ্ৰাম্য ব্যৱস্থাপনা প্ৰতিষ্ঠান, আনন্দৰ দ্বাৰা কৰা জৰীপৰ আধাৰত চিনাক্ত কৰা প্ৰাথমিক খণ্ডবোৰ হৈছে ডায়েৰী, হস্তশিল্প, কুকুৰা পালন, উদ্যান কৃষি, ৰেচম শিল্প, গাহৰি পালন।
এনএইচপিচি লিমিটেডে ২০১৮ৰ জুনৰ পৰা ধেমাজি আৰু লখিমপুৰ জিলাৰ সকলো মহিলা হিতাধিকাৰীৰ সৈতে ৰেচম শিল্প, গাহৰি পালন, হস্ততাঁত আঁচনিসমূহ ৰূপায়ন কৰিছে।
এনএইচপিচিয়ে ২০২২চনৰ ২৫নৱেম্বৰত নামনি সোৱণশিৰি জলবিদ্যুৎ প্ৰকল্পত ইয়াৰ নামনি অঞ্চলসমূহত উন্নয়নমূলক কামৰ অংশ হিচাপে জীৱিকাৰ হস্তক্ষেপৰ দিশত এক গুৰুত্বপূৰ্ণ পদক্ষেপ গ্ৰহণ কৰিছে।
মিচিংস্বায়ত্ত শাসিত পৰিষদৰ মুখ্য কাৰ্যবাহী সদস্য পৰমানন্দ চায়েংগিয়াৰ উপস্থিতিত এনএইচপিচিৰ নামনি সোৱণশিৰি জলবিদ্যুৎ প্ৰকল্পৰ কাৰ্যবাহী সঞ্চালক বিপিন গুপ্তাই SAAR গাহৰি উৎপাদক কোম্পানীৰ বাবে উমৈহতীয়া সুবিধা কেন্দ্ৰ নিৰ্মাণৰ আধাৰশিলা স্থাপন কৰে। তেওঁলোকৰ সৈতে নেটৱৰ্ক অংশীদাৰ মেচাৰ্ছ আৰোহন ফুডছ প্ৰডাক্টছ লিমিটেড আৰু বোৰ্ডৰ সদস্য আৰু উৎপাদক কোম্পানীৰ হিতাধিকাৰীসকল উপস্থিত আছিল।
SAARগাহৰি উৎপাদক কোম্পানী লিমিটেড হৈছে নামনি অঞ্চলসমূহত উন্নয়নমূলক কামৰ বাবে এনএইচপিচি লিমিটেডৰ দ্বাৰা পুঁজি যোগান ধৰা ২৫০০মহিলা সদস্যৰ কোম্পানী। সম্পূৰ্ণ হোৱাৰ পিছত, এই কেন্দ্ৰ বিজ্ঞানসন্মত কচাইঘৰ, ফিডমিল, ষ্টোৰেজ ইউনিট, নাৰ্চাৰী ইউনিট, ফৰ’য়িং শ্বেডৰ উপৰিও প্ৰশিক্ষণ কেন্দ্ৰ আৰু ৪০০ উচ্চ মানদণ্ডৰ গাহৰিৰ সৈতে ভাৰতৰ আটাইতকৈ ডাঙৰ গাহৰি প্ৰজনন কেন্দ্ৰ হব।
অনুষ্ঠানত ভাষণ প্ৰদান কৰি নামনি সোৱণশিৰি জলবিদ্যুৎ প্ৰকল্পৰ কাৰ্যবাহী সঞ্চালক বিপিন গুপ্তাই ইয়াৰ প্ৰকল্প ক্ষেত্ৰসমূহৰ ভিতৰত আৰু ইয়াৰ আশে-পাশে থকা লোকসকলৰ সৰ্বাংগীন উন্নয়নৰ প্ৰতি এনএইচপিচিৰ সংকল্পবদ্ধতাৰ কথা দোহাৰে। সমবেত লোকসকলক সম্বোধন কৰি মিচিং স্বায়ত্ত শাসিত পৰিষদৰ মুখ্য কাৰ্যবাহী সদস্য পৰমানন্দ চায়েংগিয়াই এনএইচপিচিৰ পদক্ষেপক প্ৰশংসা কৰে আৰু এই কেন্দ্ৰটোৰ উন্নয়নত সকলো ধৰণৰ সহায়ৰ আশ্বাস দিয়ে।