বিৰোধীৰ প্ৰতিবাদৰ মাজতে ৰাজ্যসভাই আজি আইন মন্ত্ৰী কিৰেন ৰিজিজুৱে উত্থাপন কৰা নিৰ্বাচনী আইন (সংশোধনী) বিধেয়ক, ২০২১ গৃহীত কৰে।
বিধেয়কখনে ভোটাৰ তালিকাক আধাৰ নম্বৰৰ সৈতে সংযোগ কৰিব বিচাৰিছে। ইয়াৰ দ্বাৰা নিৰ্বাচনী পঞ্জীয়ন বিষয়াসকলে ভোটাৰ হিচাপে পঞ্জীয়ন কৰিব বিচৰা আবেদনকাৰীসকলৰ আধাৰ নম্বৰ বিচাৰিব পাৰে।
বিতৰ্কৰ উত্তৰ দি আইন মন্ত্ৰীগৰাকীয়ে কয়, “ই এজন ব্যক্তিৰ একাধিক ভোট বিলোপ কৰিব আৰু ভুৱা ভোটাৰৰ ব্যৱস্থা পৰিষ্কাৰ কৰিব। চৰকাৰে বিষয়টো নিৰ্বাচন আয়োগৰ সৈতে বিতংভাৱে বিবেচনা কৰিছে।”
ৰিজিজুৱে কয় যে বিধেয়কখনে দেশলৈ গুৰুত্বপূৰ্ণ নিৰ্বাচনী সংস্কাৰ আনিব। তেওঁ কয় যে দেশত নিৰ্বাচনী প্ৰক্ৰিয়া বিশুদ্ধ কৰাৰ লক্ষ্যৰে এই বিধেয়কখন নিৰ্বাচন আয়োগ আৰু ৰাজ্য চৰকাৰৰ সৈতে ব্যাপক আলোচনাৰ পিছত অনা হৈছে।
বিধেয়কখন সকলো ৰাজনৈতিক দলৰ সদস্যৰে গঠিত কৰ্মচাৰী আৰু প্ৰশিক্ষণ, আইন আৰু ন্যায় বিভাগৰ স্থায়ী সমিতিৰ প্ৰতিবেদনৰ পৰামৰ্শৰ ওপৰত আধাৰিত বুলি উল্লেখ কৰে ৰিজিজুৱে।
আনহাতে বিৰোধী নেতাসকলে বিধেয়কখন উত্থাপন কৰাৰ প্ৰক্ৰিয়াৰ ওপৰত একাধিক পইণ্ট অফ অৰ্ডাৰ উত্থাপন কৰে।
কংগ্ৰেছৰ আনন্দ শৰ্মা আৰু তৃণমূলৰ ডেৰেক অ’ ব্ৰায়েনে অভিযোগ কৰে যে বিৰোধীয়ে বিধেয়কখন অনুসৰণ কৰিবলৈ পৰ্যাপ্ত সময় পোৱা নাই।
