আন্তঃৰাষ্ট্ৰীয় সংস্থা ৰিপ’ৰ্টাৰ্ছ উইদাউট বৰ্ডাৰ্ছ (RSF)-ৰ ৱৰ্ল্ড প্ৰেছ ফ্ৰিডম ইনডেক্স-২০২৫ প্ৰতিবেদনত প্ৰকাশ পাইছে চাঞ্চল্যকৰ তথ্য। প্ৰতিবাদন অনুসৰি ২০১৪ চনত নৰেন্দ্ৰ মোদী ক্ষমতালৈ অহাৰ পিছৰে পৰা ভাৰতৰ সংবাদ মাধ্যমৰ ওপৰত চলি আছে এক স্বঘোষিত জৰুৰীকালীন অৱস্থা। শেহতীয়া কৈ প্ৰকাশিত ১৮০খন দেশৰ তালিকাত ভাৰতে ১৫১ নম্বৰ স্থান লাভ কৰিছে, যিটো বিগত বৰ্ষৰ (১৫৯) তুলনাত কিছু উন্নতি হ’লেও, পৰিস্থিতি এতিয়াও ‘অতি গুৰুতৰ’ হিচাপে চিহ্নিত হৈছে। প্ৰতিবেদনত চৰকাৰী আৰু কৰ্পৰেট হেঁচা, ‘গোডী মিডিয়া’ৰ উত্থান, সাংবাদিকৰ হত্যা, আৰু কাশ্মীৰত সাংবাদিকৰ হাৰাশাস্তিৰ বিষয়ে গুৰুতৰ উদ্বেগ প্ৰকাশ কৰা হৈছে। মুকেশ আম্বানীৰ নিয়ন্ত্ৰণত থকা ৭০টাতকৈ অধিক মিডিয়া হাউছ আৰু গৌতম আদানীৰ হাতত এনডিটিভিৰ অধিগ্ৰহণৰ ফলত সংবাদ মাধ্যমৰ বৈচিত্ৰ্যৰ অন্ত পৰাৰ আশংকা ব্যক্ত কৰিছে এই প্ৰতিবেদনে।
প্ৰধানমন্ত্ৰী মোদীৰ নেতৃত্বত সংবাদ মাধ্যমৰ ওপৰত নিয়ন্ত্ৰণ তীব্ৰতৰ হৈ পৰা দেখা গৈছে। তেওঁ সংবাদমেল অনুষ্ঠিত নকৰে, কেৱল বন্ধুত্বপূৰ্ণ সাংবাদিকক সাক্ষাৎকাৰ দিয়ে, আৰু সমালোচকসকলৰ প্ৰতি কঠোৰ মনোভাৱ প্ৰদৰ্শন কৰা দেখিবলৈ পোৱা যায়। ‘গোডী মিডিয়া’ নামেৰে পৰিচিত বিজেপি-সমৰ্থক সংবাদ মাধ্যমবোৰে অপপ্ৰচাৰৰ জৰিয়তে চৰকাৰৰ পক্ষ গ্ৰহণ কৰাৰ ফলত স্বাধীন সাংবাদিকতাৰ স্থান সংকুচিত হৈ পৰিছে। ২০২১ৰ তথ্য প্ৰযুক্তি নিয়ম আৰু ২০২৩ৰ ডিজিটেল ব্যক্তিগত তথ্য সুৰক্ষা আইনৰ জৰিয়তে অনলাইন বিষয়বস্তু নিয়ন্ত্ৰণ কৰা হৈছে। চৰকাৰৰ তীব্ৰ সমালোচনা কৰা সাংবাদিকসকলে ছ’চিয়েল মিডিয়াত ট্ৰ’লিং, ভাবুকি, শাৰীৰিক আক্ৰমণ, আৰু গ্ৰেপ্তাৰৰ সন্মুখীন হ’বলগীয়া হৈছে। কাশ্মীৰত পৰিৱেশ আৰু স্থানীয় বিষয়ৰ ওপৰত প্ৰতিবেদন দিয়া সাংবাদিকসকলক আৰক্ষী আৰু অৰ্ধসামৰিক বাহিনীৰ হাৰাশাস্তিৰ চিকাৰ হ’বলগীয়া হৈছে।
উল্লেখ্য যে ভাৰতত সাংবাদিকৰ সুৰক্ষাৰ অৱস্থা অত্যন্ত উদ্বেগজনক। প্ৰতি বছৰ গড়ে দুজনৰ পৰা তিনিজন সাংবাদিকক তেওঁলোকৰ কামৰ বাবে হত্যা কৰা হয়, যাৰ ফলত ভাৰত বিশ্বৰ অন্যতম বিপজ্জনক দেশ হিচাপে পৰিগণিত হৈছে।
দেশৰ ১৪ কোটি জনসংখ্যাৰ ভিতৰত ২১ কোটিৰ ঘৰত টেলিভিছন আছে, আৰু ৯০০টা ব্যক্তিগত টিভি চেনেলৰ মাজত আধা সংবাদ সম্প্ৰচাৰৰ বাবে। প্ৰায় ২০ হাজাৰ দৈনিক বাতৰি কাকতকে ধৰি ১,৪০,০০০ প্ৰকাশকৰ মুঠ প্ৰচলন ৩৯ কোটিতকৈ অধিক। নতুন প্ৰজন্মই ছ’চিয়েল মিডিয়াৰ জৰিয়তে বাতৰি পঢ়াৰ প্ৰতি আগ্ৰহী হৈছে। সেয়ে সম্প্ৰতি ছপা মাধ্যমক অতিক্ৰম কৰি বাতৰিৰ প্ৰধান উৎস হৈ পৰিছে। কিন্তু এই পৰিৱৰ্তনৰ মাজতো সাংবাদিকৰ স্বাধীনতা আৰু সুৰক্ষাৰ প্ৰতি হেঁচা অব্যাহত থকাত ভাৰতৰ গণতন্ত্ৰৰ ভৱিষ্যতৰ বাবে উদ্বেগ বৃদ্ধি কৰিছে।
