কৰ’নাৰ প্ৰথমটো ঢৌৰ পাছত কেন্দ্ৰীয় চৰকাৰে সঠিকভাৱে পৰিস্থিতিৰ পৰ্যালোচনা কৰাত ব্যৰ্থ হৈছে। এই দাবী ৰাষ্ট্ৰীয় স্বয়ং সেৱক সংঘৰ মুৰব্বী মোহন ভাগৱতৰ।
কৰ’নাৰ ব্যাপক সংক্ৰমণৰ ফলত সমগ্ৰ দেশ বিপৰ্যস্ত হৈ পৰিছে। এনে পৰিস্থিতিত কেন্দ্ৰৰ মোদী চৰকাৰে বিৰোধীৰ সমালোচনাৰ সন্মুখীন হ’বলগীয়া হৈছে।
ইয়াৰ মাজতে অতিমাৰীক লৈ কেন্দ্ৰীয় চৰকাৰ জগৰীয়া কৰিলে ৰাষ্ট্ৰীয় স্বয়ং সেৱক সংঘৰ মুৰব্বী মোহন ভাগৱতে।
ভাগৱতে স্পষ্টভাৱে দাবী কৰে যে কৰ’নাৰ প্ৰথমটো ঢৌৰ পাছত চৰকাৰ সতৰ্ক নহ’ল।
যোৱা ১১মে’ৰ পৰা আৰএছএছৰ ফালৰ পৰা ‘পজিটিভ আনলিমিটেড’ নামৰ এটা ছিৰিজ আৰম্ভ কৰা হৈছিল।
ইয়াতেই নিজৰ বক্তৱ্য ৰাখি শনিবাৰে মোহন ভাগৱতে কয়,’’প্ৰথমটো ঢৌ চম্ভালি লোৱাৰ পাছত চৰকাৰ, প্ৰশাসন, জনসাধাৰণ সকলোৱে কিছু গা এৰা মনোভাৱ দেখুৱাইছে। আমি সকলোৱে জানিছিলো যে কৰ’নাৰ দ্বিতীয় ঢৌ আহিব। এতিয়া আমি সজাগ নোহোৱাৰ মূল্য ভৰিছো। চিকিৎসকসকলে এতিয়া কৈছে কৰ’নাৰ তৃতীয় ঢৌ আহিব। গতিকে আমি ভয় নকৰি উপযুক্ত প্ৰস্তুতি লোৱা উচিত।‘’
ভাগৱতে লগতে কয়, ‘’দেশৰ বৰ্তমান পৰিস্থিতিত মোৰ প্ৰাক্তন ব্ৰিটিছ প্ৰধানমন্ত্ৰী উইনষ্টন চাৰ্চিলৰ কথা এটা মনত পৰিছে। তেওঁ কৈছিল যে কাৰ্যালয়ত কোনো নেতিবাচক চলক, মই সেইটো নিবিচাৰো। পৰাজয়ৰ বিষয়ে জানিবলৈ মই একেবাৰেই আগ্ৰহী নহয়। ইয়াত পৰাজয় থাকিব নোৱাৰে। জীৱন-মৃত্যুৰ প্ৰক্ৰিয়া চলি থাকিব। এইবোৰে আমাক ভয় দেখুৱাব নোৱাৰে। আমি কৰ’নাৰ বিৰুদ্ধে জয়ী হ’মেই।”
