তথ্য জনাৰ অধিকাৰ আইন (আৰ টি আই)ৰ প্ৰশ্নৰ জৰিয়তে লাভ কৰা চৰকাৰী তথ্য অনুসৰি বিগত দশকত অসমত বিভিন্ন চৰকাৰী আৰু ব্যক্তিগত উন্নয়ন প্ৰকল্পৰ বাবে এক লাখৰো অধিক পূৰ্ণবয়স্ক গছ কটা হৈছে।
প্ৰধান বন সংৰক্ষকৰ কাৰ্যালয় আৰু অসম পৰিৱেশ, বন আৰু জলবায়ু পৰিৱৰ্তন বিভাগৰ মুখ্য বন বিষয়াৰ পৰা পোৱা তথ্য অনুসৰি ২০১৬ চনৰ মে’ মাহত অসমত বিজেপিৰ প্ৰথমখন চৰকাৰ গঠন হোৱাৰ পাছৰে পৰা ৰাজ্যজুৰি ১,০৬,৮৯৬ ডাল পূৰ্ণবয়স্ক গছ কাটি পেলোৱা হৈছে।
ৰাজ্যৰ ৪৪টা বন্যপ্ৰাণী আৰু আঞ্চলিক বন বিভাগৰ ভিতৰত ১৫টা বিভাগৰ পৰা এই তথ্য সংগ্ৰহ কৰা হৈছে, যিয়ে এই প্ৰাসংগিক তথ্য প্ৰদান কৰিছে। আনহাতে ১২টা বিভাগে গছ কটাৰ সবিশেষ নিদিয়াৰ বিপৰীতে বাকী ১৬টা বিভাগে এতিয়াও আৰ টি আইৰ প্রশ্নৰ উত্তৰ দিয়া নাই৷
উল্লেখযোগ্য যে আৰ টি আইৰ প্ৰশ্নৰ উত্তৰ দিয়া ২৭টা বিভাগৰ কোনো এটাই ইমান বৃহৎ সংখ্যক গছ কটাৰ পূৰ্বে বা পিছত কোনো ধৰণৰ পৰিৱেশ প্ৰভাৱৰ মূল্যায়ন কৰাৰ কথা কোৱা নাই। চৰকাৰী পৰিসংখ্যা অনুসৰি ৰাজ্যজুৰি অধিসূচিত বনাঞ্চলত ২৬ হাজাৰৰো অধিক গছ কাটি পেলোৱাৰ বিপৰীতে বাকীবোৰ অবনাঞ্চল অঞ্চলত কাটি পেলোৱা হৈছে।
মুঠৰ ভিতৰত পথ, দলং, উৰণীয়া সেতু, কাৰখানা, চিকিৎসা মহাবিদ্যালয়, আৰক্ষী বেটেলিয়ন আৰু অন্যান্য আন্তঃগাঁথনি নিৰ্মাণকে ধৰি চৰকাৰী প্ৰকল্পৰ বাবে প্ৰায় ৮৪ হাজাৰ গছ কাটি পেলোৱা হৈছে। তথ্য অনুসৰি ব্যক্তিগত কামত ১০ হাজাৰৰো অধিক গছ কাটি পেলোৱা হৈছে।
আৰ টি আইৰ তথ্যই এই কথাও প্ৰকাশ কৰিছে যে শেহতীয়া বছৰবোৰত গছ কটাৰ গতি ত্বৰান্বিত হৈছে। ২০২১ চনৰ পৰা ২০২৫ চনৰ ভিতৰত মুখ্যমন্ত্ৰী হিমন্ত বিশ্ব শৰ্মাৰ কাৰ্যকালত প্ৰায় ৬৫ হাজাৰ গছ কটাৰ বিপৰীতে সৰ্বানন্দ সোণোৱালৰ নেতৃত্বত পূৰ্বৰ চৰকাৰৰ দিনত ১৮ হাজাৰৰো অধিক গছ কাটিছিল। ৰাজ্যৰ পৰিবেশ, বন আৰু জলবায়ু পৰিবৰ্তন মন্ত্ৰী চন্দ্ৰ মোহন পাটোৱাৰীয়ে গছ কটাৰ সন্দৰ্ভত ব্যাখ্যা আগবঢ়াই কয় যে উন্নয়নমূলক প্ৰকল্পৰ সুবিধাৰ বাবে “অতি প্ৰয়োজনত” এই গছ কটা হৈছে। পাটোৱাৰীয়ে কয়, “ৰাজ্যজুৰি বিভিন্ন উন্নয়নমূলক প্ৰকল্পৰ বাবে এই গছবোৰ কাটি পেলোৱা হৈছে। আন্তঃগাঁথনি উন্নয়নৰ বাবে ই প্ৰয়োজনীয় আছিল।”
ইপিনে, এক লাখতকৈ অধিক গছ গছ কটাৰ পিছত পৰিৱেশৰ সঞ্চিত ক্ষতিৰ মূল্যায়নৰ বাবে কোনো পদ্ধতিগত অধ্যয়ন কৰা হোৱা নাই বুলিও পৰিৱেশ বিশেষজ্ঞসকলে উদ্বিগ্নতা প্ৰকাশ কৰিছে।
