তথ্য জনাৰ অধিকাৰ (আৰ টি আই) আইনৰ অধীনত দ্য টেলিগ্ৰাফে দাখিল কৰা আবেদনৰ উত্তৰত কেন্দ্ৰীয় চৰকাৰে ভাৰতীয় ভাষা সমিতিৰ অধ্যক্ষ চামু কৃষ্ণ শাস্ত্ৰীৰ তথ্য তথা তেওঁৰ অৰ্হতাৰ বিশদ তথ্য প্ৰদান কৰাত চূৰান্ত ব্যৰ্থতাৰ সন্মুখীন হৈছে। ২০২১ চনত এই পদত নিযুক্ত শাস্ত্ৰী সংস্কৃত ভাৰতীৰ সদস্য, যি সংস্থা আৰ এছ এছৰ সৈতে জড়িত আৰু শিশুৰ শিবিৰৰ দৰে কাৰ্যক্ৰমৰ জৰিয়তে সংস্কৃত শিক্ষাৰ প্ৰসাৰৰ বাবে কাম কৰে। শিক্ষা মন্ত্ৰালয়ে ২০২১ চনৰ নৱেম্বৰত ভাৰতীয় ভাষাৰ প্ৰচাৰৰ উপায়ৰ পৰামৰ্শ দিবলৈ ভাৰতীয় ভাষা সমিতি (বিবিএছ) গঠন কৰিছিল। কিন্তু, শাস্ত্ৰীৰ নিযুক্তি আৰু তেওঁৰ দৰমহা নিৰ্ধাৰণৰ ভিত্তিৰ বিষয়ে স্পষ্ট তথ্য প্ৰদান কৰাত মন্ত্ৰালয় বিফল হৈছে।
শিক্ষা মন্ত্ৰালয়ৰ আৰ টি আইৰ সঁহাৰিত শাস্ত্ৰীৰ দৰমহা নিৰ্ধাৰণৰ ভিত্তিৰ সূত্ৰ বিচৰা অনুৰোধকো অগ্ৰাহ্য কৰিছে। কেন্দ্ৰীয় জনসংযোগ বিষয়া (চিপিআইঅ’)য়ে শাস্ত্ৰীৰ বায়’-ডাটা কপি প্ৰদান কৰিব নোৱাৰাৰ লগতে তেওঁৰ দৰমহাৰ নিৰ্ধাৰণ প্ৰক্ৰিয়াৰ বিষয়েও কোনো ব্যাখ্যা দিব নোৱাৰিলে। উত্তৰত কোৱা হৈছিল যে উচ্চ শিক্ষা বিভাগৰ চিপিআইঅ’ই উপলব্ধ তথ্য প্ৰদান কৰিছে, কিন্তু আবেদনত বিচৰা নিৰ্দিষ্ট তথ্যৰ ক্ষেত্ৰত কোনো স্পষ্ট উত্তৰ দিয়া হোৱা নাই।
সংবাদ পত্ৰ দ্য টেলিগ্ৰাফে প্ৰকাশ কৰা প্ৰতিবেদন অনুসৰি, ২০২৩ চনৰ ডিচেম্বৰৰ পৰা শাস্ত্ৰীক মাহিলী ২.৫ লাখ টকা হাৰত মুঠ ৫০ লাখ টকা প্ৰদান কৰা হৈছে, যি এজন কেন্দ্ৰীয় বিশ্ববিদ্যালয়ৰ উপাচাৰ্যৰ দৰমহাতকৈও অধিক। এই পৰিমাণৰ দৰমহাৰ ন্যায্যতা আৰু ইয়াৰ নিৰ্ধাৰণ প্ৰক্ৰিয়াৰ বিষয়ে স্পষ্ট তথ্যৰ অভাৱে স্বাভাবিকতে প্ৰশ্ন উত্থাপন কৰিছে। আৰ টি আইৰ জৰিয়তে স্বচ্ছতা নিশ্চিত কৰাৰ উদ্দেশ্য থকা সত্ত্বেও, শিক্ষা মন্ত্ৰালয়ৰ এনে অস্পষ্ট সঁহাৰিয়ে চৰকাৰী কাৰ্যপদ্ধতিৰ স্বচ্ছতাৰ ওপৰতো প্ৰশ্ন উত্থাপন কৰিছে।
