চলিত বাজেট অধিৱেশনত আদানী গোটৰ জালিয়াতিক কেন্দ্ৰ কৰি উত্তপ্ত হৈ পৰিছে সংসদ। আজিও সংসদত চৰ্চাৰ শীৰ্ষত থাকে আদানী বিতৰ্ক। আদানীৰ বিষয়ত আলোচনাৰ বাবে সংসদত কেন্দ্ৰীয় চৰকাৰৰ ওপৰত হেঁচা প্ৰয়োগ কৰি আহিছে বিৰোধীয়ে। অৱশ্যে বিৰোধীৰ দাবীক এইপৰ্যন্ত কাণসাৰ কৰা নাই চৰকাৰে।
আদানী বিতৰ্কৰ মাজতে আজি সদনৰ মজিয়াত তৃণমূল কংগ্ৰেছৰ সাংসদ মহুৱা মৈত্ৰৰ এক বক্তব্যক লৈ আন এক বিতৰ্কৰ সূত্ৰপাত হয়। নিজ ভাষণত মৈত্ৰই ‘আপত্তিজনক’ শব্দ ব্যৱহাৰ কৰা বুলি অভিযোগ উঠাৰ পিছতে লোকসভাত উত্তপ্ত পৰিস্থিতিৰ সৃষ্টি হয়।
ভাৰতীয় জনতা পাৰ্টিৰ সাংসদ সকলে মহুৱা মৈত্ৰৰ মন্তব্যৰ তীব্ৰ বিৰোধিতা কৰি মৈত্ৰক ক্ষমা খুজিবলৈ দাবী জনায়। লোকসভাত টিডিপি নেতা কে ৰাম মোহন নাইডুৱে দিয়া ভাষণৰ মাজতে মহুৱা মৈত্ৰই বক্তব্য ৰখাৰ সময়ত এই আপত্তিজনক শব্দ ব্যৱহাৰ কৰা বুলি অভিযোগ উঠিছে।
লোকসভাৰ অধ্যক্ষ ওম বিৰলাৰ অনুপস্থিতিত ভৰত্ৰুহৰী মাহতাবে মহুৱা মৈত্ৰৰ এই মন্তব্য সন্দৰ্ভত বক্তব্য ৰাখি এই মন্তব্য ৰেকৰ্ডত নাথাকিব বুলি উল্লেখ কৰে। “কিছুমান অতি কঠোৰ আৰু আপত্তিজনক শব্দ ব্যৱহাৰ কৰা হৈছে। সংসদীয় পৰিক্ৰমা মন্ত্ৰীক মই তৃণমূল কংগ্ৰেছৰ সৈতে কথা পাতিবলৈ ক’ম।”- মাহতাবে কয়।
ইফালে বিজেপিৰ জ্যেষ্ঠ নেতা তথা কেন্দ্ৰীয় সংসদীয় পৰিক্ৰমা মন্ত্ৰী প্ৰলহাদ যোশীয়ে লোকসভাত তৃণমূল দলৰ নেতাৰ সৈতে এই সন্দৰ্ভত আলোচনা কৰিব বুলি মন্তব্য কৰে। যোশীয়ে কয় যে তেওঁ মৈত্ৰৰ এনে আচৰণৰ বাবে তৃণমূলক ক্ষমা খুজিবলৈ ক’ব। কিন্তু যদি মৈত্ৰই ইয়াৰ পাছতো ক্ষমা নোখোজে, তেতিয়াহ’লে সেয়াই তেওঁলোকৰ সংস্কৃতি বুলি নিশ্চিত হ’ব।
উল্লেখ্য যে আজি সংসদত কংগ্ৰেছ নেতা ৰাহুল গান্ধীৰ লগতে মহুৱা মৈত্ৰয়ো আদানি গ্ৰুপৰ বিষয়ক লৈ কেন্দ্ৰক তীব্ৰ সমালোচনা কৰে আৰু লগতে মাৰ্কেট নিয়ন্ত্ৰক ছিকিউৰিটিজ এণ্ড এক্সচেঞ্জ ব’ৰ্ড অৱ ইণ্ডিয়া (ছেবি) এই সন্দৰ্ভত কিয় “ছাইলেণ্ট অপাৰেটৰ” হৈ আহিছে বুলি প্ৰশ্ন উত্থাপন কৰে।
শেহতীয়াকৈ আদানী গ্ৰুপৰ এফ পি অ’ত তদন্তৰ প্ৰতিবেদন সম্পূৰ্ণ নকৰাকৈ কিয় অনুমোদন দিয়া হ’ল সেই সন্দৰ্ভতো প্ৰশ্ন উত্থাপন কৰে মৈত্ৰই। সাংসদগৰাকীয়ে লগতে আদানী গ্ৰুপত জালিয়াতি সংঘটিত হোৱা বুলি উঠা অভিযোগৰ সম্পূর্ণ তদন্তৰ দাবী জনায়।
