সন্ত্ৰাসবাদী ‘মেটা’! মেটাক সন্ত্ৰাসবাদী আৰু উগ্ৰপন্থী সংগঠনৰ তালিকাত স্থান দিলে ৰাছিয়াই
সামাজিক মাধ্যমৰ তিনিটা মূল জনপ্ৰিয় চাইট ফেচবুক, ইনষ্টাগ্ৰাম আৰু ৱাটছ্এপৰ মূল কোম্পানী আমেৰিকা যুক্তৰাষ্ট্ৰৰ প্ৰযুক্তি প্ৰতিষ্ঠান ‘মেটা’ক সন্ত্ৰাসবাদী আৰু উগ্ৰপন্থী সংগঠনৰ এখন তালিকাত অন্তৰ্ভুক্ত কৰিছে ৰাছিয়াই।
আজি ফেডাৰেল চাৰ্ভিচ ফৰ ফাইনেন্সিয়েল মনিটৰিঙৰ এক প্ৰতিবেদনত এই দাবী কৰা হৈছে।
চলিত বৰ্ষৰে মাৰ্চ মাহৰ শেষৰ ফালে ৰাছিয়াই ফেচবুক আৰু ইনষ্টাগ্ৰামক উগ্ৰপন্থী কাৰ্যকলাপ চলোৱাৰ অভিযোগত নিষিদ্ধ কৰিছিল।
তেতিয়াৰ পৰা ৰাছিয়াত ফেচবুক আৰু ইনষ্টাগ্ৰাম ব্যৱহাৰ বন্ধ হৈ আছে যদিও একাংশ ৰাছিয়ানে ভিপিএনৰ সহায়ত এই চাইট সমূহ ব্যৱহাৰ কৰি আছে।
মেটাৰ অধীনস্থ ইনষ্টাগ্ৰাম ৰাছিয়াত বিশেষভাৱে জনপ্ৰিয় আছিল। বিজ্ঞাপন আৰু বাণিজ্যৰ বাবে দেশখনত ইনষ্টাগ্ৰাম এক গুৰুত্বপূৰ্ণ মঞ্চ হিচাপে ব্যৱহৃত হৈছিল।
ৰাছিয়াই মেটাৰ ওপৰত গ্ৰহণ কৰা এই সিদ্ধান্তই মেটাক এতিয়া তালিবান আৰু ৰাছিয়াৰ বিৰোধী গোটকে ধৰি বিদেশী সন্ত্ৰাসবাদী সংগঠনৰ দৰে একে তালিকাত ৰাখিছে।