পুনৰ যুদ্ধৰ জুই জ্বলি উঠিছে ৰাছিয়া-ইউক্ৰেইনৰ মাজত। যোৱা কেইঘণ্টামানৰ ভিতৰত ৰাছিয়াৰ বাহিনীয়ে ইউক্ৰেইনৰ বিভিন্ন প্ৰান্তত ৫০টাতকৈও অধিক ক্ষেপণাস্ত্ৰ আক্ৰমণ চলাই সমগ্ৰ দেশখনতে আতংকৰ সৃষ্টি কৰিছে। ৰাছিয়াৰ এই আক্ৰমণত ৩জন লোকৰ মৃত্যু আৰু কমেও ১৬ জন লোক আহত হৈছে।
বিশেষকৈ ৰাষ্ট্ৰপতি ভ’ল’ডিমাইৰ জেলেনস্কিৰ গৃহ চহৰ ক্ৰীভি ৰিহত আৱাসিক অট্টালিকাত বেলিষ্টিক ক্ষেপণাস্ত্ৰৰ আঘাতত কমেও ১০ জন লোক আহত হোৱাৰ লগতে পানী যোগান ব্যৱস্থাত ব্যাহত কৰে।
এতিয়াও এই আক্ৰমণ অব্যাহত আছে, আৰু অধিক আক্ৰমণৰ সম্ভাৱনা আছে। ইউক্ৰেইনৰ বায়ুসেনাই জনোৱা মতে, তীব্ৰ আক্ৰমণত ৰাছিয়াই ইস্কাণ্ডাৰ আৰু অন্যান্য বেলিষ্টিক মিছাইল ব্যৱহাৰ কৰিছিল। বুধবাৰৰ সন্ধিয়াৰ পৰাই এই ঘটনা আৰম্ভ হয়। ক্ৰীভি ৰিহত বিমান আক্ৰমণৰ সতৰ্কবাণী জাৰি কৰাৰ কিছু সময়ৰ পিছতে বেলিষ্টিক মিছাইলটোৱে আৱাসিক এলেকাত খুন্দা মাৰে।
স্থানীয় প্ৰশাসনৰ মুৰব্বী অলেকজেণ্ডাৰ ভিলকুলে জনোৱা মতে, দুটা ইস্কাণ্ডাৰ ক্ষেপণাস্ত্ৰই এটা এপাৰ্টমেণ্ট বিল্ডিঙত খুন্দা মৰাত ১০ জন লোক আহত হয়, ইয়াৰে এজন গুৰুতৰভাৱে আহত হয়। আনহাতে, মহানগৰীৰ পানী যোগানো ক্ষতিগ্ৰস্ত হোৱাৰ ফলত হাজাৰ হাজাৰ বাসিন্দা খোৱাপানীৰ অভাৱত পৰিছে।
জেলেনস্কিৰ শৈশৱৰ ঘৰ ক্ৰীভি ৰিহ বাৰে বাৰে ৰাছিয়াৰ আক্ৰমণৰ লক্ষ্য হৈ পৰিছে আৰু এই আক্ৰমণ আটাইতকৈ বিধ্বংসী আক্ৰমণৰ ভিতৰত অন্যতম।
এই আক্ৰমণ কেৱল ক্ৰীভি ৰিহৰ মাজতে সীমাবদ্ধ নহয়। ইউক্ৰেইনৰ বায়ুসেনাই জনোৱা মতে, বিগত দুঘণ্টাত দেশৰ বিভিন্ন প্ৰান্তত ৫০টাতকৈও অধিক ক্ষেপণাস্ত্ৰ নিক্ষেপ কৰা হৈছে, ইয়াৰে বহুতো ক্ষেপণাস্ত্ৰ শক্তিৰ আন্তঃগাঁথনি আৰু সামৰিক স্থানক লক্ষ্য কৰি নিক্ষেপ কৰা হৈছে।
খাৰকিভ, ড্নিপ্ৰ’, জাপ’ৰিজিয়া আদি চহৰত বিস্ফোৰণৰ বাতৰি পোৱা গৈছে। ৰাছিয়াৰ প্ৰতিৰক্ষা মন্ত্ৰালয়ে এই আক্ৰমণ ইউক্ৰেইনৰ সামৰিক লক্ষ্য আৰু শক্তিৰ কেন্দ্ৰৰ বিৰুদ্ধে কৰা বুলি দাবী কৰিছে যদিও ইউক্ৰেইনৰ পক্ষই কয় যে ইয়াক ইচ্ছাকৃতভাৱে অসামৰিক অঞ্চলক লক্ষ্য কৰি লোৱা হৈছে।
ৰাষ্ট্ৰপতি জেলেনস্কিয়ে এই আক্ৰমণক “সন্ত্রাসবাদ” বুলি অভিহিত কৰি আন্তঃৰাষ্ট্ৰীয় সমাজৰ পৰা অধিক সহায়ৰ বাবে আবেদন জনায়। শেহতীয়া উত্তেজনাৰ পটভূমিত এই তীব্ৰ আক্ৰমণ। যোৱা কেইটামান সপ্তাহত ৰাছিয়াই ইউক্ৰেইনৰ শক্তি গ্ৰীডত বাৰে বাৰে আক্ৰমণ চলাইছে, যাৰ ফলত শীতকালত লাখ লাখ লোক বিদ্যুৎ বিহীন হৈ পৰিছে।
জানুৱাৰী মাহৰ আৰম্ভণিৰ পৰাই খাৰকিভত একাধিক ক্ষেপণাস্ত্ৰ আক্ৰমণৰ ফলত অসামৰিক লোকৰ মৃত্যু হৈছে। ৫০ টাতকৈও অধিক ক্ষেপণাস্ত্ৰৰ এই ধুমুহাই যুদ্ধত এক নতুন মাত্ৰা যোগ কৰিলে। ইউক্ৰেইনৰ বায়ু প্ৰতিৰক্ষাই বহু ক্ষেপণাস্ত্ৰ ধ্বংস কৰিলেও কেইটামান ক্ষেপণাস্ত্ৰই আঘাত কৰিবলৈ সক্ষম হৈছে। ফলত চহৰবোৰত ধোঁৱা আৰু ধ্বংসাৱশেষৰ ছবি ছ’চিয়েল মিডিয়াত ভাইৰেল হৈ পৰিছে।
ইপিনে, ৰাছিয়াৰ বিৰুদ্ধে আমেৰিকাই লোৱা পদক্ষেপসমূহৰ পিছত ৰাছিয়াৰ ৰাষ্ট্ৰপতি পুটিনে আওপকীয়াকৈ ইউক্ৰেইনৰ ওপৰত আক্ৰমণ চলাই তাৰ প্ৰত্যুত্তৰ দিয়া বুলি ধাৰণা কৰা হৈছে।
