কৰ’নাক নিয়ন্ত্ৰণ কৰিবলৈ ভেকচিন দুটা ড’জ লোৱাটো জৰুৰী হৈ আহিছিল। এইবাৰ এটা ড’জেৰেই কৰ’নাক নিয়ন্ত্ৰণ কৰিব পৰা যাব বুলি দাবী কৰিছে ৰাছিয়াই।
কৰ’না ভেকচিন স্পুটনিক-ভিৰ এটা ড’জেই মাৰাত্মক কৰ’না ভাইৰাছৰ বিৰুদ্ধে কাৰ্যকৰী হ’ব। এটা ড’জৰ ভেকচিনৰ বাবে ৰাছিয়াৰ আৰডিআইএফৰ ফালৰ পৰা অনুমোদন দিয়া হৈছে।
বাতৰি অনুসৰি, কাৰ্যকৰিতাৰ ফালৰ পৰা দুটা ড’জকৈ এই এটা ড’জৰ ভেকচিন অলপ পিছুৱাই আছে। কিন্তু কম সময়ৰ ভিতৰতে বহু মানুহক টীকাকৰণ কৰিবলৈ হ’লে স্পুটনিক লাইট কামত আহিব বুলি ভৱা হৈছে।
ৰাছিয়াৰ এই ভেকচিন বিশ্বৰ ৬০খন দেশত অনুমোদন লাভ কৰিছে। অৱশ্যে, এতিয়াও ইউৰোপীয় মেডিচিন এজেন্সি বা আমেৰিকা যুক্তৰাষ্ট্ৰৰ খাদ্য তথা ঔষধ প্ৰশাসনৰ দ্বাৰা অনুমোদিত হোৱা নাই।
আৰডিআইএফে এক বিবৃতিত স্পষ্ট কৰি কৈছে যে স্পুটনিক ভি ভেকচিনৰ দুটা ড’জ ল’লে ইয়াৰ কাৰ্যকৰিতা ৯১.৬শতাংশ। কিন্তু এটা ড’জৰ ক্ষেত্ৰত সেয়া ৭৯.৪শতাংশ। ভেকচিন লোৱাৰ ২৮দিনৰ পাছত লাভ কৰা তথ্য বিশ্লেষণ কৰি এই কথা জানিব পৰা গৈছে।
যোৱা ২০২০চনৰ ৫ডিচেম্বৰৰ পৰা চলিত বছৰৰ ১৫ এপ্ৰিললৈকে চলা পৰীক্ষা-নিৰীক্ষাৰ ভিত্তিত স্পুটনিক লাইটক অনুমোদন দিয়া হৈছে। ভাৰতীয় মুদ্ৰাত ইয়াৰ দাম হ’ব ৭৩০টকা।
কম সময়ৰ ভিতৰতে অধিক লোকক ভেকচিন প্ৰদান কৰিবলৈ হ’লে এই ভেকচিন বিশেষ কাৰ্যকৰী হ’ব। ইয়াৰ ফলত ক্ষিপ্ৰতাৰে ৰোগ প্ৰতিৰোধ ক্ষমতা গড়ি তোলাটো সম্ভৱ হৈ পৰিব।
