ইউক্ৰেইনৰ ছুমিত ধাৰাবাহিকভাৱে ক্ষেপণাস্ত্ৰ আক্ৰমণ। ধ্বংসাৱশেষলৈ পৰিণত হৈছে চহৰৰ এটা অংশ । দেওবাৰে ৰাছিয়াৰ আক্ৰমণত কমেও ৩১ জন লোক নিহত আৰু ৮৩ জন আহত হৈছে। ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কিয়ে ৰাছিয়াত হোৱা ধ্বংসলীলাৰ ভিডিঅ’ শ্বেয়াৰ কৰি তেওঁ বিশ্ববাসীক এই আক্ৰমণৰ প্ৰতি শক্তিশালী সঁহাৰি দিবলৈও আহ্বান জনায়।
দেওবাৰৰ আক্ৰমণৰ সন্দৰ্ভত ইউক্ৰেইনৰ কৰ্তৃপক্ষই কয় যে ৰাছিয়াই চহৰৰ মাজমজিয়াত বেলিষ্টিক মিছাইলেৰে আক্ৰমণ কৰিছে। ক্ষেপণাস্ত্ৰ আক্ৰমণত বহু লোকে প্ৰাণ হেৰুৱালে। ইউক্ৰেইনৰ স্বৰাজ মন্ত্ৰালয়ে জনোৱা মতে, আহত ৮৩ জনৰ ভিতৰত ৭টা শিশুও আছে। মৃতকৰ সংখ্যা আৰু বৃদ্ধি পাব পাৰে বুলি আশংকা কৰা হৈছে।
জেলেনস্কিয়ে শ্বেয়াৰ কৰা ভিডিঅ’ত দেখা গৈছে যে কেইবাটাও মৃতদেহ আৰু আহত লোকক ধ্বংসাৱশেষৰ পৰা উলিয়াই চুমি চহৰৰ ৰাজপথলৈ উলিয়াই অনা হৈছে। চাৰিওফালে কাঁচ আৰু কংক্ৰিটৰ টুকুৰাবোৰ সিঁচৰতি হৈ আছিল। জ্বলি ছাই হৈ পৰিছে বহু ঘৰ। ছ’চিয়েল মিডিয়াত এটা পোষ্টযোগে ইউক্ৰেইনৰ ৰাষ্ট্ৰপতিগৰাকীয়ে নিহতসকলৰ পৰিয়াললৈ সমবেদনা জ্ঞাপন কৰে।
একে সময়তে জেলেনস্কিয়ে এই আক্ৰমণৰ প্ৰতি সঁহাৰি জনাবলৈ বিশ্ববাসীক আহ্বান জনায়। আমেৰিকা, ইউৰোপ আৰু এই চলি থকা যুদ্ধৰ অন্ত পেলাব বিচৰা সকলোৱে একত্ৰিত হৈ এই কাণ্ডৰ প্ৰতিবাদ কৰিব লাগিব বুলি মন্তব্য কৰে। ৰাছিয়াই এই ধৰণৰ সন্ত্ৰাসবাদক জীয়াই ৰাখিব বিচাৰে। যুদ্ধ শেষ হোৱাটো তেওঁলোকে নিবিচাৰে বুলি জেলেনস্কিয়ে মন্তব্য কৰে। ৰাছিয়াৰ ওপৰত হেঁচা প্ৰয়োগ নকৰিলে শান্তি ঘূৰাই অনা সম্ভৱ নহয় বুলি মত প্ৰকাশ কৰে। জেলেনস্কিয়ে ৰাছিয়াৰ প্ৰতি সন্ত্ৰাসবাদীৰ যোগ্য মনোভাৱ দেখুৱাব লাগিব বুলি মত প্ৰকাশ কৰিছে।
তিনি বছৰ ধৰি ৰাছিয়া আৰু ইউক্ৰেইনৰ মাজত যুদ্ধ চলি আছে। এতিয়ালৈকে শান্তি প্ৰতিষ্ঠাৰ সকলো প্ৰচেষ্টা ব্যৰ্থ হৈছে। ইফালে আমেৰিকাই দুয়োটা দলৰ সৈতে কথা পাতিছে। আমেৰিকাইও শান্তিৰ বাবে বিভিন্ন প্ৰস্তাৱ আগবঢ়াইছে। ব্যৰ্থ হৈছে দুই দেশৰ মাজত শান্তি প্ৰতিষ্ঠা কৰাৰ সকলো প্ৰচেষ্টা।
