ৰাছিয়াই ইউক্ৰেইন আক্ৰমণ কৰাৰ পিছতে ইউৰোপৰ প্ৰায়ভাগ দেশেই ৰাছিয়াৰ বিৰুদ্ধে অৰ্থনৈতিক নিষেধাজ্ঞা জাৰি কৰিছিল। সকলোৱে ভাবিছিল যে ৰাছিয়াৰ সৈতে হয়তো ইউৰোপীয় দেশসমূহে সঁচাকৈয়ে বাণিজ্যিক সম্পৰ্ক ছেদ কৰিব । কিন্তু কোনো এখন ইউৰোপীয় দেশেই তেনে কৰা নাই।
ৰাছিয়াৰ পৰা ইউৰোপীয় দেশসমূহে তেল আমদানিহে কৰি আহিছে। কিন্তু ভাৰতে ৰাছিয়াৰ পৰা তেল আমদানী কৰাৰ বিষয়টোত গৰজি উঠিছে ইউৰোপীয় দেশসমূহ।
ৰাছিয়াই ইউৰোপীয় দেশসমূহৰ এনে স্থিতিক সমালোচনা কৰিছে। ভাৰতত ৰাছিয়াৰ ৰাষ্ট্ৰদূত ডেনিছ অলিপাভে এই সন্দৰ্ভত কৰা মন্তব্যই বহুতকে জোকাৰি গৈছে। অলিপাভে কয় “পশ্চিমীয়া দেশসমূহে ৰাছিয়াৰ পৰা ভাৰতৰ তেল ক্ৰয় কৰা কাৰ্যক গৰিহণা দিছে। আনহাতে, তেওঁলোকে নিজেই ৰাছিয়াৰ পৰা তেল ক্ৰয় কৰি আহিছে। এই ক্ষেত্ৰত, ইউৰোপীয় দেশবোৰে আন্তঃৰাষ্ট্ৰীয় নিয়মবোৰ অনুসৰণ কৰা নাই । তেওঁলোকে নিজৰ সুবিধা অনুসৰি নিয়ম প্ৰস্তুত কৰিছে।
ইউক্ৰেইনৰ ওপৰত আক্ৰমণৰ প্ৰতিবাদত আমেৰিকা যুক্তৰাষ্ট্ৰকে ধৰি কেইবাখনো পশ্চিমীয়া দেশে ৰাছিয়াৰ বিৰুদ্ধে বিভিন্ন নিষেধাজ্ঞা আৰোপ কৰিছে। সেই নিষেধাজ্ঞাবোৰৰ এটা আছিল যে ৰাছিয়াৰ পৰা কোনো দেশে খাৰুৱা তেল ক্ৰয় কৰিব নোৱাৰি। ফলত ক্ৰেতা দেশৰ সংখ্যা হঠাতে হ্ৰাস হোৱাৰ বাবে ৰাছিয়াই ভাৰতক বহুত কম মূল্যত তেল বিক্ৰী কৰা আৰম্ভ কৰিছিল।ভাৰতক তেল বিক্ৰী কৰাৰ বাবে কেইবাখনো ইউৰোপীয় দেশে ৰাজহুৱাভাৱে ৰাছিয়াক গৰিহণা দিছে।
কিন্তু ৰাছিয়াৰ সৈতে সমান্তৰালভাবে সেই দেশসমূহে বাণিজ্যিক সম্পৰ্কৰ বজাই ৰাখিছে। ইউৰোপীয় দেশসমূহে বৃহৎ পৰিমাণত ৰাছিয়াৰ পৰা খাৰুৱা তেল আমদানি অব্যাহত ৰাখিছে বুলি অলিপাভে মন্তব্য কৰে।
অলিপাভে কয়, ” তেওঁলোকে নিজে ৰাছিয়াৰ তেল ক্ৰয় কৰি আছে, আনহাতে আনপিনে তেনে দেশসমূহেই ভাৰতক গৰিহণা দিছে। ফলস্বৰূপে, তেওঁলোকৰ দুমুখীয়া স্থিতি উন্মোচিত হৈছে”।
