যুদ্ধবিধস্ত ইউক্ৰেইনত এতিয়া কেৱল আতংক, যুদ্ধৰ দাবানল। যুদ্ধৰ বিভীষিকাই হৰি নিছে ইউক্ৰেইনৰ কত শিশুৰ শৈশৱৰ আনন্দ!
যিসকলৰ পৃথিৱীত কেৱল ৰঙ পেঞ্চিল, চকলেট, পুতলা আৰু বেলুন আছিল, এতিয়া চাইৰেনৰ প্ৰচণ্ড শব্দত তেওঁলোকৰ টোপনি ভাঙে।
কঁপি উঠা শৈশৱ আৰু মাকৰ বুকুত লুকুৱাই ৰখা শিশুৰ মুখ! বোমা বিস্ফোৰণৰ ফলত কঁপি উঠিছে ঘৰবোৰ। বাৰুদৰ গোন্ধত গধুৰ হৈ পৰিছে বতাহ। হয়, ইউক্ৰেইনে এতিয়া এনেদৰেই গনিছে শংকাৰ প্ৰহৰ।
শিশুৰ বিদ্যালয়লৈ যোৱা বন্ধ। বন্ধ খেলপথাৰ, উদ্যান, উৎসৱ, সকলো। কিছুমান ভূগৰ্ভস্থ বাংকাৰত লুকাই আছে। নিজৰ প্ৰিয় ব্যক্তি- প্ৰিয় স্থান এৰি সুৰক্ষিত আশ্ৰয়ৰ সন্ধানত আন দেশলৈ যাত্ৰা কৰিছে সকলোৱে।
দৰাচলতে যুদ্ধ মানে কেৱল মৃত্যু নহয়, অথবা কেৱল সম্পত্তিৰ ক্ষয়-ক্ষতি নহয়, যুদ্ধই সলনি কৰি পেলায় সকলো! ওলট-পালট হয় পৰিস্থিতিবোৰ। সৰুৰ পৰা ডাঙৰলৈ সকলোৰে ওপৰত ইয়াৰ আঁচোৰ ৰৈ যায়।
সেয়েহে সমগ্ৰ বিশ্বৰ শান্তিপ্ৰেমী লোকসকলে ইউক্ৰেইনৰ এই সংকটত তেওঁলোকৰ কাষত থিয় দিছে। তেওঁলোকে সামাজিক মাধ্যমত যুদ্ধ নহয়, শান্তিৰ বাৰ্তা প্ৰচাৰ কৰি আছে।
সেই মিচিলত নতুন সংযোজন হৈছে এটা ভিডিঅ’ বাৰ্তা। বাৰ্তাটো দিছে লিলি নামৰ এটি শিশুৱে।
তাই নাজানে যুদ্ধ কিয় হয়, তাই নাজানে ক্ষমতা আৰু ৰাজনীতিৰ মাজৰ সম্পৰ্ক আৰু এই সকলো বোৰ গধুৰ শব্দ। কিন্তু আধাফুটা মাতেৰেই তাই কৈ গ’ল, তাই কি বিচাৰে।
“মই পৃথিৱীত শান্তি বিচাৰো, পৃথিৱীৰ টুকুৰা নহয়।” তাই পৃথিৱীত শান্তি বিচাৰে। পৃথিৱী টুকুৰা-টুকুৰ হৈ যোৱাটো নিবিচাৰে এই শিশুটিয়ে। তাই মনত পেলাই দিছে সাৰ্বজনীন ভাতৃত্ববোধৰ কথা। তাই আঙুলি তুলি ধমক দিছে যু্দ্ধ বন্ধ কৰাৰ।
তাইৰ এই অনুৰোধ যুদ্ধত আসক্ত লোকসকলৰ কাণৰ পৰ্দাত পৰিব নে নাই লিলিয়ে হয়তো নাজানে। কিন্তু তাইৰ এই বাৰ্তাই স্পৰ্শ কৰিব পাৰিছে পৃথিৱীৰ বহুতো লোকক।
এই সৰু ভিডিঅ’টি সামাজিক মাধ্যমত ভাইৰেল হৈ পৰাৰ পিছত এতিয়া লিলিৰ কাষত থকাৰ প্ৰতিশ্ৰুতি দিছে বহুজনে।
যুদ্ধৰ অন্ত পৰক। সময়বোৰ হৈ পৰক লিলিৰ দৰে প্ৰতিজন শিশুৰ!
