ট্ৰেইনত গৈ আছিল ব্ৰিটেইন আৰু চুইডেনৰ প্ৰাক্তন প্ৰধানমন্ত্ৰী, হঠাতে ৰাছিয়াৰ ড্ৰোন আক্ৰমণ, তাৰ পিছত…

ব্ৰিটেইনৰ প্ৰাক্তন প্ৰধানমন্ত্ৰী বৰিছ জনছনে ৰাছিয়াৰ ড্ৰ’ন আক্ৰমণৰ পৰা কথমপি নিজৰ জীৱন ৰক্ষা কৰিলে। তেওঁ এতিয়া নিৰাপদে আছে। বৰিছৰ লগতে ছুইডেনৰ প্ৰাক্তন প্ৰধানমন্ত্ৰী কাৰ্ল বিল্ড, জাৰ্মান চ্যান্সেলৰ ফ্ৰেড্ৰিখ মেৰ্জৰ উপদেষ্টা গুণ্টাৰ ছাউটাৰকে ধৰি কেইবাজনো ইউৰোপীয় কূটনীতিবিদ আৰু নিৰাপত্তা উপদেষ্টা দেওবাৰে ইউক্ৰেইনৰ সীমান্তত কোনোমতে ৰক্ষা পৰে। এই আক্ৰমণৰ পিছতে ৰাছিয়াৰ বিৰুদ্ধে পোলেণ্ড আৰু ইউক্ৰেইন একেলগে সৰৱ হৈছে।

ব্ৰিটেইনৰ বৈদেশিক মন্ত্ৰালয়ৰ সূত্ৰ অনুসৰি জনছন ইউক্ৰেইন ভ্ৰমণলৈ গৈছিল। তাৰপিছত তেওঁ ইয়ালটা ইউৰোপীয় কৌশল (YES) সন্মিলনত অংশগ্ৰহণ কৰিবলৈ কিয়েভৰ পৰা ৰে’লযোগে পোলেণ্ডলৈ গৈ আছিল। ছুইডেনৰ প্ৰাক্তন প্ৰধানমন্ত্ৰী কাৰ্ল বিল্ড আৰু জাৰ্মান চ্যান্সেলৰ ফ্ৰেড্ৰিখ মেৰ্জৰ উপদেষ্টা গুণ্টাৰ ছাউটাৰো সেই বিশেষ ৰে’লখনত আছিল। পোলেণ্ডৰ ড’ৰ’হাস্ক আৰু ইউক্ৰেইনৰ ইয়াহোডিন সীমান্তত হঠাতে ৰাছিয়াই ড্ৰ’ন আক্ৰমণ চলায়।

ইউক্ৰেইনৰ হাতত আগতীয়া সতৰ্কবাৰ্তা আহিছিল। লগে লগে ৰে’লখন ৰখাই দিয়া হয়। নিৰাপত্তাৰক্ষীয়ে দ্ৰুতগতিত উচ্চ পদস্থ প্ৰাক্তন ৰাষ্ট্ৰনেতা আৰু কূটনীতিবিদসকলক নিৰাপদ স্থানলৈ স্থানান্তৰিত কৰে। কিছু সময়ৰ পাছত পৰিস্থিতি স্বাভাৱিক হৈ পৰে। ৰে’লখন আকৌ গন্তব্যস্থানলৈ ৰাওনা হয়। অৱশ্যে এই আক্ৰমণত ৰে’লখনৰ কোনো লোকৰ ক্ষতি হোৱা নাই বুলি জানিব পৰা গৈছে।

আক্ৰমণৰ লগে লগে জনছনে ৰাছিয়াৰ বিৰুদ্ধে সৰৱ হয়। তেওঁ এই ঘটনাক ‘অৰ্থহীন’ বুলি অভিহিত কৰি ইউক্ৰেইনক অধিক অস্ত্ৰ-শস্ত্ৰ আৰু বায়ু প্ৰতিৰক্ষা ব্যৱস্থা দিয়াৰ দাবী জনায়। ব্ৰিটিছ প্ৰাক্তন প্ৰধানমন্ত্ৰীগৰাকীয়ে ইউক্ৰেইনক সহায় কৰিবলৈ ৰাছিয়াৰ সম্পত্তি জব্দ কৰাৰ পোষকতাও কৰে। তেওঁ দাবী কৰে যে ইউক্ৰেইনক সহায় কৰিলে ৰাছিয়াৰ বিৰুদ্ধে এই যুদ্ধখন ক্ষিপ্ৰতাৰে শেষ হোৱাত সহায়ক হ’ব।

This wasn’t our train, but the one just minutes after us by the 🇵🇱 border crossing. It was evacuated as the 🇷🇺 drone approached and no one was hurt. Very good safety system. Our train just had an evacuation warning but could proceed to Dorohusk. The 🇷🇺 attacks against 🇺🇦 are…

— Carl Bildt (@carlbildt) September 13, 2026

এই ঘটনাৰ পিছত পোলেণ্ডৰ বৈদেশিক মন্ত্ৰী ৰাডোছলাভ ছিকোৰস্কিয়ে ৰাছিয়ালৈ আঙুলি টোৱায়। তেওঁ দাবী কৰে যে এনে পদক্ষেপে যুদ্ধ পৰিস্থিতি ক্ৰমান্বয়ে জটিল কৰি তুলিছে। ইউক্ৰেইনৰ ৰাষ্ট্ৰপতি ভল’ডিমাইৰ জেলেনস্কিয়েও সৰৱ হৈ পৰে। তেওঁ কয় যে, “ৰাছিয়াৰ বাহিনীয়ে ইচ্ছাকৃতভাৱে ৰে’লখনক লক্ষ্য কৰি লৈছিল।” তেওঁ ৰাছিয়াই ইউক্ৰেইনৰ ৰে’ল আৰু শক্তি আন্তঃগাঁথনিৰ লগতে পশ্চিমৰ সাধাৰণ নাগৰিকক আক্ৰমণ কৰাৰ অভিযোগ উত্থাপন কৰে।