আমেৰিকাৰ অতিৰিক্ত ‘শুল্কৰ চাপ’ৰ বাবেই নতুন দিল্লী-মস্কোৰ আৰু ওচৰ চাপিছে। প্ৰধানমন্ত্ৰী নৰেন্দ্ৰ মোডীৰ আমন্ত্ৰণৰ প্ৰতি সঁহাৰি জনাই এইবাৰ ৰাছিয়াৰ ৰাষ্ট্ৰপতি ভ্লাদিমিৰ পুটিনে ভাৰত ভ্ৰমণৰ সময়সূচী চূড়ান্ত কৰিছে।
শুকুৰবাৰে ক্ৰেমলিনে ঘোষণা কৰে যে তেওঁ ডিচেম্বৰ মাহত দিল্লীলৈ আহিব। বিভিন্ন দেশৰ ওপৰত শুল্ক আৰোপ কৰি আন্তঃৰাষ্ট্ৰীয় পৰ্যায়ত অৰ্থনৈতিক অচলাৱস্থাৰ সৃষ্টি কৰিবলৈ উদ্বাউল হৈ পৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্প। বিশেষকৈ মস্কোৰ সৈতে দিল্লীৰ ভাল বাণিজ্যিক সম্পৰ্ক তেওঁৰ বাবে ‘অসহ্যকৰ’ হৈ পৰিছে। এই পৰিপ্ৰেক্ষিতত তিনি মাহৰ পাছত ৰাছিয়াৰ ৰাষ্ট্ৰপতিগৰাকীৰ ভাৰত ভ্ৰমণ নিঃসন্দেহে অতি তাৎপৰ্যপূৰ্ণ।
বৰ্তমান জাপান ভ্ৰমণত আছে প্ৰধানমন্ত্ৰী মোডী। ৩১ আগষ্ট দেওবাৰে তেওঁ তাৰ পৰা চীনলৈ ৰাওনা হ’ব। চীনৰ টিয়ানজিনত অনুষ্ঠিত হৈছে এছ চি অ’ (শ্বাংহাই সহযোগিতা সংস্থা) শীৰ্ষ সন্মিলন। ৰাছিয়াৰ ৰাষ্ট্ৰপতি ভ্লাদিমিৰ পুটিনেও এই সন্মিলনত অংশগ্ৰহণ কৰিবলৈ ওলাইছে।
শীৰ্ষ সন্মিলনৰ মাজতে ১ ছেপ্টেম্বৰ সোমবাৰে টিয়ানজিনত পৃথকে পৃথকে মোডী আৰু পুটিনে বৈঠকত মিলিত হোৱাৰ কথা। দুয়োজনে চমু আলোচনাতো মিলিত হোৱাৰ সম্ভাৱনা আছে। অৱশ্যে ক্ৰেমলিনে ইতিমধ্যে মোডীৰ আমন্ত্ৰণত ভাৰত ভ্ৰমণৰ কথা ঘোষণা কৰিছে। শনিবাৰে পুটিনৰ উপদেষ্টা ইউৰি উছাকোভে ৰাষ্ট্ৰপতিগৰাকীৰ ভাৰত ভ্ৰমণৰ তাৰিখ ঘোষণা কৰে।
তেওঁৰ মতে, পুটিনৰ এই ভ্ৰমণে নতুন দিল্লী আৰু মস্কোৰ মাজত দ্বিপাক্ষিক সম্পৰ্কত অধিক অগ্ৰগতিৰ আশা প্ৰকাশ কৰিছে, যিটো দুয়োখন দেশৰ বাবে অতি গুৰুত্বপূৰ্ণ। ৰাছিয়া-ইউক্ৰেইন যুদ্ধৰ পিছত এয়া হ’ব পুটিনৰ প্ৰথম ভাৰত ভ্ৰমণ।
যোৱা সপ্তাহত ইউক্ৰেইনৰ ৰাষ্ট্ৰপতি জেলেনস্কিৰ ভাৰতলৈ অহাৰ খবৰ পোৱা গৈছিল। নতুন দিল্লীত থকা ইউক্ৰেইনৰ দূতাবাসৰ ৰাষ্ট্ৰদূত অলেকজেণ্ডাৰ পোলিছচুকে প্ৰধানমন্ত্ৰী মোডীৰ আমন্ত্ৰণত জেলেনস্কিয়ে অতি সোনকালে দিল্লী ভ্ৰমণ কৰিব বুলি কৈছিল। তেওঁ বিচাৰে যে ভাৰতে ইউক্ৰেইন আৰু ইয়াৰ ‘বন্ধুত্বপূৰ্ণ’ দেশ ৰাছিয়াৰ মাজত চলি থকা দীৰ্ঘদিনীয়া যুদ্ধৰ অন্ত পেলাবলৈ মধ্যস্থতা কৰক। ইউক্ৰেইনৰ ৰাষ্ট্ৰপতিয়ে আগন্তুক ভ্ৰমণৰ সময়ত সেই অনুৰোধ কৰিব পাৰে। অৱশ্যে জেলেনস্কিৰ ভ্ৰমণসূচীৰ বিষয়ে এতিয়াও একো জনা হোৱা নাই।
ইয়াৰ পূৰ্বে ক্ৰেমলিনে ঘোষণা কৰিলে যে ডিচেম্বৰ মাহত ৰাছিয়াৰ ৰাষ্ট্ৰপতি ভাৰত ভ্ৰমণ কৰিব। ভূৰখা মহলৰ মতে, আমেৰিকাৰ ‘দাদাগিৰি’, চুবুৰীয়া দেশৰ মাজত সমীকৰণ, দ্বিপাক্ষিক কূটনৈতিক আৰু বাণিজ্যিক সম্পৰ্কৰ উপৰিও ৰাছিয়া-ইউক্ৰেইনৰ যুদ্ধবিৰতিৰ বিষয়ে মোডী-পুটিনে আলোচনা কৰিব পাৰে।
