ৰাজস্থানৰ ২০ মহীয়া কংগ্ৰেছ চৰকাৰ খনলৈ নামি আহিছে মহা সংকট। উপ-মুখ্যমন্ত্ৰী শচীন পাইলটে বিসম্বাদ কৰি বহু কেইজন বিধায়কক হাত কৰি লোৱাৰ পিছতে অশোক গেহলট নেতৃত্বাধীন চৰকাৰ খনলৈ নামি অহিছে চৰম দুৰ্যোগ।
শচীন পাইলটে হাৰিয়ানাৰ হোটেলত কেবাজনো বিসম্বাদী বিধায়কক লৈ ভিডিঅ’ প্ৰচাৰ কৰাৰ সময়তে আজি কংগ্ৰেছ বিধায়নী দলৰ বৈঠকে শচীন পাইলটক উপ-মুখ্যমন্ত্ৰীৰ পদৰ পৰা অপসাৰণৰ প্ৰস্তাৱ গ্ৰহণ কৰে।
কেৱল সেয়াই নহয়, বিধায়নী দলৰ বৈঠকে শচীন পাইলটক ৰাজস্থান কংগ্ৰেছৰ সভাপতি পদৰ পৰাও অপসাৰণৰ সিদ্ধান্ত গ্ৰহণ কৰে।
শচীন পাইলটৰ ঠাইত ৰাজস্থান কংগ্ৰেছৰ সভাপতি পদত অধিস্থিত কৰা হৈছে গোবিন্দ সিং ডট্ৰাছাক।
কংগ্ৰেছৰ নেতা ৰণদ্বীপ সুৰজৱালাই এই সাল সলনিৰ কথা ৰাজহুৱা কৰিছে।
শচীন পাইলটে কংগ্ৰেছ চৰকাৰ খনলৈ সংকট নমাই আনি প্ৰায় ২২ জন বিধায়কক আঁতৰাই নিয়াৰ অভিযোগ উঠিছে।
২০০ জনীয়া ৰাজস্থান বিধান সভাত চৰকাৰ বচাই ৰাখিবলৈ প্ৰয়োজন ১০১ জন বিধায়কৰ সমৰ্থন।
পাইলটে ২২ জন বিধায়ক আতঁৰাই নিয়া বুলি চৰ্চা হোৱাৰ পিছতো আজি অশোক গেহলটে ৰাজ্যপালক সাক্ষাৎ কৰি আস্থা ভোটৰ সন্মুখীন হবলৈ সাজু বুলি ঘোষণা কৰে।
