নিযুক্তিৰ স্থায়ীকৰণকে আদি কৰি বিভিন্ন দাবীৰে আজি মহানগৰীৰ চছলত প্ৰতিবাদ সাব্যস্ত কৰে সদৌ অসম আশাকৰ্মী সন্থাই।
আজি প্ৰতিবাদস্থলীত সংস্থাৰ শীৰ্ষ নেতৃত্বই কয় যে বিগত ১৬টা বছৰে ৰাষ্ট্ৰীয় স্বাস্থ্য মিছনৰ অধীনত ন্যূনতম পাৰিতোষিকৰ ওপৰত কাম কৰি আশাকৰ্মী সকলে মিছনটোক জীয়াই ৰাখিছে।
যোৱা ২০০৬ চনত ভাৰত চৰকাৰে প্ৰৱৰ্তন কৰা জননী সুৰক্ষা যোজনা নামৰ এই বৃহৎ আঁচনিটো সফল কৰাৰ ক্ষেত্ৰত আশাকর্মী সকলেই মূল মেৰুদণ্ড।
ৰাষ্ট্ৰীয় স্বাস্থ্য মিছনৰ প্ৰতিগৰাকী বিষয়-ববীয়াই দৰমহাভোগী। কিন্তু মিছনৰ সফল ৰূপায়ণ কৰি স্বাস্থ্য বিভাগৰ আমূল পৰিৱৰ্তন অনা আশাকৰ্মী সকলক বিগত ১৬টা বছৰে ভলণ্টিয়াৰ ওৱাৰ্কাৰ হিচাপেই ৰখা হৈছে বুলি সদৌ অসম আশাকৰ্মী সন্থাই অভিযোগ কৰে।
সন্থাই লগতে কয় যে জননী সুৰক্ষা যোজনা আঁচনিৰ উপৰিও স্বাস্থ্য বিভাগৰ ১০০ শতাংশ কামৰ ৯০ শতাংশ কামেই আশাকৰ্মীৰ জৰিয়তে চলাই আছে। উপযুক্ত মজুৰি নিদিয়াকৈয়ে ৯০ শতাংশ কামৰ মুনাফা লৈ আছে বুলি তেওঁলোকে অভিযোগ কৰে।
অসমৰ চুকে-কোণে সিঁচৰিত হৈ থকা ৩২,৯২৫ গৰাকী আশাকর্মীক অসম চৰকাৰে শোষণ, নির্যাতন কৰি আছে বুলিও অভিযোগ কৰিছে সদৌ অসম আশাকৰ্মী সন্থাই।
তেওঁলোকে কয়, “তৃণমূল কর্মী হিচাপে আশাকর্মী সকলৰ নিৰ্দ্ধাৰিত সময়সীমা নাই। ত্যাগ আৰু নিষ্ঠাৰে কাম কৰাৰ পিছতো আজিলৈকে অসম চৰকাৰে উপযুক্ত মজুৰি দিব নোৱাৰাটো অতি দুখজনক কথা।”
এনে পৰিস্থিতিত সন্থাই আগন্তুক বাজেট অধিৱেশনত আশাকর্মী সকলক উপযুক্ত মজুৰি দিয়াৰ ব্যৱস্থা কৰিবলৈ দাবী জনাইছে ।
তদুপৰি আশাকর্মী সকলক স্থায়ীকৰণৰ প্ৰস্তাৱ অতিশীঘ্ৰে কেন্দ্ৰীয় চৰকাৰলৈ প্ৰেৰণ কৰাৰ লগতে ৬০ ঊর্ধৰ আশাকর্মী সকলক পেঞ্চন দিয়াৰ ব্যৱস্থা কৰিবলৈও সদৌ অসম আশাকৰ্মী সন্থাই দাবী জনাইছে।
