পেহেলগামত আক্ৰমণ কৰা চাৰিজন সন্ত্ৰাসবাদীৰ ফটো প্ৰকাশ পাইছে। ইয়াৰে দুজন পাকিস্তানী। বাকী দুজন কাশ্মীৰৰ বুলি জানিব পৰা গৈছে। আক্ৰমণকাৰী কেইজন আছিল জুনেইদ, চুলেমান শ্বাহ, আবু তালহা আৰু আছিফ শ্বেখ।
সমগ্ৰ ঘটনাৰ দায়িত্ব স্বীকাৰ কৰিছে ৰেজিষ্টেণ্ট ফ্ৰণ্টে। অৱশ্যে এই আক্ৰমণৰ মাষ্টাৰমাইণ্ড লস্কৰ-ই-তৈবাৰ ডেপুটি চীফ বুলি সূত্ৰই প্ৰকাশ কৰিছে।
জানিব পৰা মতে, কালি এনে এটা নৰকীয় ঘটনাৰ বাবে ইতিমধ্যে বৈছৰনত উপস্থিত হৈছিল সন্ত্ৰাসবাদীসকল। ৰেইকি প্ৰদৰ্শন কৰি সমগ্ৰ অঞ্চলটোৰ বুজ লোৱা হৈছিল। ব্লুপ্ৰিণ্ট তৈয়াৰ কৰি মঙলবাৰে বিয়লি হিন্দু পৰ্যটকক নিৰ্বাচিতভাৱে গুলীয়াই হত্যা কৰা হয়।
এই কাৰ্যৰ বাবে পাকিস্তানী সেনা আৰু পাকিস্তানী চোৰাংচোৱা সংস্থা আই এছ আইক দোষাৰোপ কৰা হৈছে। সূত্ৰ অনুসৰি এই ছইফুল্লাহ খালিদ ওৰফে ছইফুল্লাহ কাছুৰীয়ে দুমাহ পূৰ্বে এখন বৈঠকৰ আয়োজন কৰিছিল। তাত উপস্থিত আছিল পাকিস্তানী সেনাৰ সদস্য। সেইদিনা তাত ভাৰত বিৰোধী ভাষণ দিয়া হৈছিল।
পেহেলগাম কাণ্ডৰ মাষ্টাৰমাইণ্ড হৈছে ছইফুল্লাহ। সূত্ৰই প্ৰকাশ কৰিছে যে তেওঁক পোনপটীয়াকৈ আই এছ এ আই আৰু পাকিস্তান সেনাবাহিনীয়ে সমৰ্থন কৰিছিল।
ইপিনে, আজি অৰ্থাৎ বুধবাৰে সেই স্থানত উপস্থিত হয় গৃহমন্ত্ৰী অমিত শ্বাহ। অনন্তনাগ চিকিৎসালয়ত তেওঁ আহত পৰ্যটকক সাক্ষাৎ কৰে। কথা পাতি পৰিস্থিতি বুজ লবলৈ চেষ্টা কৰে। আনহাতে, অজিত ডোভালৰ সৈতে এখন বৈঠক অনুষ্ঠিত হোৱাৰ খবৰ আহিছে।
এনে ঘটনাত আতংকিত হৈ পৰিছে পৰ্যটকসকল। বাচি যোৱাসকলে নিশা বিনিদ্ৰ ৰজনী কটাইছে। আতংকই খেদি ফুৰিছে। কোনো স্থানীয় লোকক বিশ্বাস কৰিব পৰা নাই। এতিয়া মাত্ৰ ঘৰ পোৱাৰ অপেক্ষা। জানিব পৰা মতে, আৱদ্ধ হৈ থকা সকলোকে শীঘ্ৰে ঘূৰাই অনাৰ প্ৰচেষ্টা চলোৱা হৈছে।
