১৯৮৪ চনত দিল্লীৰ জনকপুৰী আৰু বিকাশপুৰীত সংঘটিত শিখ বিৰোধী সংঘৰ্ষৰ সৈতে জড়িত দুটা হত্যাকাণ্ডৰ গোচৰত দোষমুক্ত হ’ল প্ৰাক্তন কংগ্ৰেছ সাংসদ সজ্জন কুমাৰ। দিল্লীৰ ৰাউজ এভিনিউ আদালতৰ ন্যায়াধীশ ডিগ বিনয় কুমাৰে বৃহস্পতিবাৰে এই নিৰ্দেশ দিয়ে। প্ৰাথমিকভাৱে তেওঁ মৌখিক আদেশ দিছে। এই সম্পূর্ণ ৰায় এতিয়াও ৰাজহুৱা হোৱা নাই৷
প্ৰধানমন্ত্ৰী ইন্দিৰা গান্ধীৰ হত্যাৰ পিছত ১৯৮৪ চনত দেশত একপ্ৰকাৰ শিখনিধন যজ্ঞ চলিছিল। সেই অশান্তিৰ সময়ত ১ নৱেম্বৰত সৰস্বতী বিহাৰত যশৱন্ত সিং আৰু তেওঁৰ পুত্ৰ তৰুনদীপ সিং নামৰ এজন লোকক হত্যা কৰাৰ লগত কংগ্ৰেছ নেতা সজ্জন কুমাৰৰ নাম জড়িত হৈ পৰিছিল।
সেই সময়ত সজ্জন কুমাৰ দিল্লীৰ ৰাজনগৰৰ সাংসদ আছিল। প্ৰথম অৱস্থাত পঞ্জাৱী বাগ আৰক্ষী থানাত এজাহাৰ দাখিল কৰা হৈছিল। ইয়াৰ পিছতে এটা বিশেষ তদন্তকাৰী দল গঠন কৰা হয় আৰু তেওঁলোকক তদন্তৰ দায়িত্ব দিয়া হয়। ২০২১ চনৰ ১৬ ডিচেম্বৰত আদালতে সজ্জনৰ বিৰুদ্ধে হত্যাৰ অভিযোগ উত্থাপন কৰে।
অধিবক্তাসকলে দাবী কৰে যে ইন্দিৰা গান্ধীৰ মৃত্যুৰ পিছত বৃহৎ সংখ্যক উন্মত্ত জনতাই শিখসকলক আক্ৰমণ কৰে। সেই সময়ত যশৱন্তৰ ঘৰত আক্রমণ হৈছিল। তেওঁ আৰু তেওঁৰ পুত্ৰক হত্যা কৰা হৈছিল। ঘৰতো লুটপাত কৰি অগ্নিসংযোগ কৰে।
হত্যাকাণ্ডৰ উপৰি সজ্জনৰ নেতৃত্বত অঞ্চলটোত এটা গুৰদ্বাৰা জ্বলোৱাৰ অভিযোগ উঠে। যশৱন্তৰ পত্নীৰ অভিযোগৰ ভিত্তিত এই গোচৰৰ তদন্ত আৰম্ভ হৈছিল। ২০২৫ চনৰ ফেব্ৰুৱাৰী মাহত দিল্লীৰ বিশেষ আদালতে সজ্জনক যাৱজ্জীৱন কাৰাদণ্ডৰ শাস্তি প্ৰদান কৰিছিল। তেওঁ এতিয়া জেলত আছে।
কিন্তু ১৯৮৪ চনৰ ১ নৱেম্বৰত জানকপুৰী অঞ্চলত সোহন সিং আৰু জোঁৱাই অৱতাৰ সিঙৰ হত্যাকাণ্ড আৰু ১৯৮৪ চনৰ ২ নৱেম্বৰত বিকাশপুৰীত গুৰচৰণ সিঙক জ্বলাই দিয়া গোচৰত বৃহস্পতিবাৰে দিল্লীৰ ৰাউজ এভিনিউ আদালতে সজ্জন কুমাৰক দোষমুক্ত কৰে।
১৯৮৪ চনত পালাম কলনীত ৫জন শিখৰ হত্যাকাণ্ডৰ গোচৰত ২০১৮ চনত দিল্লী উচ্চ ন্যায়ালয়ে দিয়া ৰায়ত তেওঁ যাৱজ্জীৱন কাৰাদণ্ড ভুগি আছে।
