ৰাজ্য চৰকাৰে চলিত বর্ষৰ ৩০ জানুৱাৰীত গুৱাহাটীৰ খানাপাৰাত বিশাল সমাৱেশ আয়োজন কৰি ৪৫১১ গৰাকী শিক্ষকৰ হাতত নিযুক্তি পত্ৰ প্ৰদান কৰিছিল। নিযুক্তি গ্রহণ কৰি শিক্ষক সকল নিজ নিজ বিদ্যালয়ত যোগদান কৰি নিয়মীয়াকৈ কাৰ্যনিৰ্বাহ কৰি আছে যদিও বৰ্তমানেও তেওঁলোকে পাব লগা দৰমহা লাভ কৰা নাই আৰু নিৰ্বাচনৰ পূর্বে দৰমহা লাভ কৰিবনে নকৰে সেইটো স্পষ্ট হোৱা নাই।
ইয়াক লৈ ৰাজ্যৰ শিক্ষক সকল দুশ্চিন্তাত পৰা দেখা গৈছে। জানিব পৰা মতে এই মুহূৰ্তলৈকে কোষাগাৰ সমূহলৈ প্ৰয়োজনীয় বাজেট শিক্ষা বিভাগে প্ৰেৰণ কৰা নাই।
নিৰ্বাচনৰ পূর্বে দৰমহা লাভ কৰিবনে নকৰে শিক্ষা বিভাগৰ ওচৰতো নিৰ্ভৰযোগ্য তথ্য নাই বুলি সদৰি কৰি সদৌ অসম বেতন বঞ্চিত কৰ্মৰত প্ৰাথমিক শিক্ষক সন্থাৰ সভানেত্রী হেমাঞ্জলী ভুঞা দত্ত আৰু সাধাৰণ সম্পাদক বসন্ত নেওগে নিৰ্বাচনৰ পূর্বে ৰাজ্যৰ সদ্য নিযুক্তি প্ৰাপ্ত শিক্ষকসকলক দৰমহা প্ৰদান কৰিবৰ বাবে চৰকাৰক আহ্বান জনাইছে।
যদি নিৰ্বাচনৰ পূর্বে দৰমহা লাভ কৰাৰ পৰা শিক্ষক সকল বঞ্চিত হব লগা হয় তেন্তে চৰকাৰে শিক্ষক সকলক কণা হাঁহক পতান দিয়াৰ বাহিৰে আন একো নহয় বুলি মন্তব্য আগবঢ়াইছে ৰাজ্যৰ শিক্ষক সমাজে।
উল্লেখ্য যে বিগত ২০/২৫ বছৰ পূর্বে এইসকল শিক্ষকে চৰকাৰীভাৱে নিযুক্তি গ্রহণ কৰি বুনিয়াদী প্ৰশিক্ষণ গ্রহণ কৰিও প্ৰয়োজনীয় দৰমহাৰ পৰা বঞ্চিত হৈ আহিছিল।
বৰ্তমানৰ শাসকীয় দলৰ চৰকাৰখনে বিগত বিধানসভা নির্বাচনৰ পূর্বে শাসনৰ গাদীত অধিষ্ঠিত হোৱাৰ পাছত চাকৰি সমূহ নিয়মীয়াকৰণৰ ৰাজহুৱা আশ্বাস প্রদান কৰিছিল। চৰকাৰৰ পৃষ্ঠপোষকতাত আয়ুক্ত পৰ্যায়ত হোৱা তদন্তৰ প্ৰতিবেদনৰ ওপৰত ভিত্তি কৰি অতি শেহতীয়াভাৱে চাকৰি নিয়মীয়াকৰণ কৰি নিযুক্তি পত্ৰ প্ৰদান কৰাত শিক্ষক সকলে হেৰুৱা সন্মান লাভ কৰাত উৎফুল্লিত হৈ নিজৰ নিজৰ কৰ্ম ক্ষেত্রত নিয়োজিত হৈ আহিছে।
কিন্তু যোৱা ৩০ জানুৱাৰীতে নিযুক্তি দিয়াৰ পাছতো বৰ্তমানেও দৰমহা প্ৰদান নকৰাত শিক্ষকসকল পুনৰ প্ৰবঞ্চনাৰ বলি হোৱাৰ আশংকা কৰা দেখা গৈছে।
তদুপৰি শিৱসাগৰ জিলাৰ ১২০ গৰাকী শিক্ষক নিযুক্তি লাভৰ পৰা বঞ্চিত হৈ ৰব লগা হ’ল।
উল্লেখ্য যে আয়ুক্ত পৰ্যায়ত হোৱা তদন্তৰ ওপৰত ভিত্তি কৰি শিক্ষা বিভাগে বুনিয়াদী প্ৰশিক্ষণ গ্রহণ কৰা শিক্ষকসকলক শিক্ষক হিচাবে নিযুক্তি পত্ৰ প্ৰদান কৰাৰ বিপৰীতে প্ৰশিক্ষণ নথকা শিক্ষকসকলক টিউটৰ হিচাবে নিযুক্তি পত্ৰ প্ৰদান কৰিছে।
কিন্তু শিৱসাগৰ জিলাৰ ৫৩ গৰাকী শিক্ষক প্ৰশিক্ষণপ্ৰাপ্ত হোৱাৰ পাছতো অতি দুৰ্ভাগ্যজনকভাৱে টিউটৰ হিচাবে নিযুক্তি গ্রহণ কৰিব লগা হৈছে।
আনহাতে, প্ৰশিক্ষণ গ্রহণ নকৰা আৰু মাত্র তিনিমাহ প্ৰশিক্ষণ লোৱা আন একাংশ শিক্ষকে আয়ুক্ত পৰ্যায়ত হোৱা তদন্তৰ প্ৰতিবেদনক ভেঙুচালি কৰি শিক্ষক হিচাবে নিযুক্তি লবলৈ সুবিধা লাভ কৰিলে ইয়াক লৈ শিক্ষকসকলৰ মাজত এক বৃহৎ প্ৰশ্ন উত্থাপন হোৱা দেখা গৈছে।
২০১২ চনলৈকে দৰমহা লাভ কৰা আৰু আয়ুক্ত পৰ্যায়ত হোৱা তদন্তত প্ৰয়োজনীয় সকলো তথ্য দাখিল কৰাৰ পাছতো শিক্ষা বিভাগৰ চৰম অৱহেলাৰ বাবেই শিক্ষক সকল বঞ্চিত হব লগা হল বুলি ক্ষোভ উজাৰিছে বঞ্চিত তথা দুৰ্ভগীয়া শিক্ষক সকলে।.
সদৌ অসম বেতন বঞ্চিত কৰ্মৰত প্ৰাথমিক শিক্ষক সন্থাৰ সভানেত্রী হেমাঞ্জলী ভুঞা দত্ত আৰু সাধাৰণ সম্পাদক বসন্ত নেওগে নিৰ্বাচনৰ পূর্বে দৰমহা মুকলি কৰি দিবৰ বাবে শিক্ষা বিভাগক দাবী জনাইছে।
তদুপৰি যিসকল শিক্ষক অবাঞ্ছিতভাৱে থাকি গৈছে তেওঁলোকৰ ক্ষেত্ৰতো সহানুভূতিৰে বিবেচনা কৰিবৰ বাবে সন্থাৰ তৰফৰ পৰা চৰকাৰক আহ্বান জনাইছে।
