ছলমান খানৰ মেগা ৰিলিজ ‘চিকন্দৰ’ দেওবাৰে মুক্তি পাবলৈ সাজু হৈছে। ঈদৰ বাবে শুকুৰবাৰৰ পৰিৱৰ্তে এই দিনটো নিৰ্ধাৰণ কৰা হৈছিল। কিন্তু মুক্তিৰ মাত্ৰ কেইঘণ্টামান আগতে ছলমান খান আৰু টিম চিকন্দৰৰ বাবে এটা ডাঙৰ আঘাত আহিল। একাধিক অনলাইন প্লেটফৰ্মত ছবিখন ফাদিল হৈছে।
এই মেগা বাজেটৰ ছবিখনক লৈ অনুৰাগীৰ মাজত এক উন্মাদনা আছিল। আগতীয়া বুকিঙৰ ক্ষেত্ৰতো চিনেমাখনে এক অভিলেখ গঢ়ি তুলিছিল। স্বাভাৱিকতে ‘মেগা ওপেনিং’ৰ বাবে অপেক্ষা কৰি আছে বলীউড। কিন্তু তাৰ আগতে ছবিখন অনলাইনত লিক হোৱাৰ ফলত ব্যৱসায় ক্ষতিগ্ৰস্ত হ’ব বুলি আশংকা কৰা হৈছে।
সূত্ৰ অনুসৰি, এই চিনেমা আৰু ডাউনলোড লিংক ‘TamilRockers’, ‘MovieRules’, ‘Filmizilla’ আনকি কেইবাটাও টেলিগ্ৰাম গ্ৰুপতো প্ৰচাৰিত হৈ আছে। এই পৰ্যন্ত টিম চিকন্দৰৰ পৰা কোনো প্ৰতিক্ৰিয়া পোৱা হোৱা নাই। ইয়াৰ পূৰ্বেও কেইবাখনো বলীউডৰ ছবিয়ে এনে সমস্যাৰ সন্মুখীন হৈছিল।
দীৰ্ঘদিনীয়া বিৰতিৰ অন্তত ‘গজিনী’ খ্যাত এ আৰ মুৰুগাডোছৰ পৰিচালনাত পুনৰ ডাঙৰ পৰ্দালৈ উভতি আহিছে বলীউডৰ ভাইজান। ছবিখন মুক্তি পোৱাৰ আগতেই তেওঁৰ কণ্ঠত এটা আত্মবিশ্বাসৰ সুৰ শুনা গৈছিল।
ছলমানে কৈছিল যে ছবিখনে ২০০ কোটিতকৈও অধিক ব্যৱসায় কৰিব বুলি তেওঁ আত্মবিশ্বাসী। এই ছবিখনত ছলমানৰ বিপৰীতে দেখা যাব ৰশ্মিকা মন্দানাক। তেওঁতকৈ ৩১ বছৰ সৰু নায়িকাৰ সৈতে অন স্ক্ৰীণ ৰোমাঞ্চৰ বাবে বিতৰ্কৰ সন্মুখীন হ’বলগীয়া হৈছিল ছলমান।
এই সকলোবোৰৰ মাজতে নতুন শ্বকটো হ’ল অনলাইন লিক। এতিয়া প্ৰশ্ন হৈছে ছলমান খানে সকলো বাধা অতিক্ৰম কৰি ২০০ কোটি আয়ৰ ‘কমিটমেণ্ট’ পূৰণ কৰিব পাৰিবনে?
