Salman Rushdie on Ventilator নিউয়ৰ্কত ছুৰিকাঘাতত গুৰুতৰভাৱে আহত ব্ৰিটিছ ঔপন্যাসিক ছলমান ৰুশ্বডিৰ অস্ত্ৰোপচাৰ সম্পন্ন হৈছে। তেওঁ বৰ্তমান ভেণ্টিলেটৰ ছাপোৰ্টত আছে। তেওঁ বৰ্তমান কথা কব পৰা নাই। তেওঁৰ এটা চকু নষ্ট হৈ পৰাৰ সম্ভাৱনা আছে। বিবিচিৰ এক বাতৰিত এই তথ্য দাঙি ধৰা হৈছে।
ৰুশ্বডিৰ এগৰাকী ব্যক্তিগত বিষয়া এণ্ড্ৰিউ ৱাইলিয়ে কয়, “ছলমান ৰুশ্বডিয়ে হয়তো এটা চকু হেৰুৱাব পাৰে। তেওঁৰ যকৃত গুৰুতৰভাৱে ক্ষতিগ্ৰস্ত হৈছে। তেওঁৰ হাতৰ স্নায়ুবোৰ ছিন্ন হৈ গৈছে আৰু তেওঁৰ পাকস্থলীও ক্ষতিগ্ৰস্ত হৈছে।”
চলমান ৰুশ্বডি আমেৰিকা যুক্তৰাষ্ট্ৰৰ নিউয়ৰ্কত ছুৰীআক্ৰমণৰ বলি হয়। ৰুশ্বডিয়ে শুকুৰবাৰে নিউয়ৰ্কৰ শ্বিটোকোৱা ইনষ্টিটিউটত এক অনুষ্ঠানত ভাষণ দিছিল। এজন আক্ৰমণকাৰীয়ে হঠাতে তেওঁৰ কান্ধত চুৰিকাঘাত কৰে।
লগতে পঢ়ক: আমেৰিকা যুক্তৰাষ্ট্ৰৰ প্ৰাক্তন ৰাষ্ট্ৰপতি ডোনাল্ড ট্ৰাম্পৰ ঘৰৰ পৰা অতি গোপন নথিপত্ৰ জব্দ FBIৰ
ঘটনাৰ পিছতে তেওঁক ততাতয়াকৈ হেলিকপ্টাৰেৰে চিকিৎসালয়লৈ লৈ যোৱা হয়। ঘটনাটোৰ পিছত স্থানীয় আৰক্ষীয়ে ২৪ বছৰীয়া হাদি মাটাৰ নামৰ এজন সন্দেহজনক ব্যক্তিক গ্ৰেপ্তাৰ কৰে।
আৰক্ষীয়ে কয় যে আক্ৰমণকাৰীজনে মঞ্চত উঠি গৈ ৰুশ্বডি আৰু তেওঁৰ সাক্ষাৎগ্ৰহণকাৰীক আক্ৰমণ কৰে। ৰুশ্বডিক চুৰিৰে কান্ধত উপৰ্যপুৰি আঘাত কৰে। আক্ৰমণকাৰীজনক পিছত আৰক্ষীয়ে জিম্মাত লয়।
উল্লেখ্য যে ৭৫ বছৰীয়া ভাৰতীয় বংশোদ্ভূত বুকাৰ বঁটা বিজয়ী লেখক ৰুশ্বডিয়ে ১৯৮১ চনত তেওঁৰ মিডনাইটছ চিল্ড্ৰেন নামৰ কিতাপখনৰ দ্বাৰা খ্যাতি অৰ্জন কৰে।
লগতে পঢ়ক: ভাৰত-চীন উত্তেজনাৰ মাজতে ভাৰতত অৱতৰণ ফ্ৰান্সৰ তিনি খনকৈ যুদ্ধ বিমানৰ, কিয় আহিল যুদ্ধ বিমান?
কিন্তু ১৯৮৮ চনত তেওঁ তেওঁৰ চতুৰ্থ খন কিতাপ দ্য ছেটানিক ভাৰ্চেছৰ বাবে ৯ বছৰ আত্মগোপন কৰি থাকিব লগা হৈছিল। কিয়নো বহুতেই ইয়াত ইছলাম ধৰ্মক অপমান কৰা বুলি অভিযোগ তুলিছিল। ছলমান ৰুশ্বডিয়ে কিতাপখন প্ৰকাশ হোৱাৰ পিছৰে পৰা মৃত্যুৰ ভাবুকি লাভ কৰি অহৰো অভিযোগ উঠিছিল।
