পক্ষীতীৰ্থৰূপে প্ৰখ্যাত তথা কৰতী মাছৰ একমাত্ৰ থলি হিচাপে খ্যাত নগাঁও জিলাৰ ঐতিহাসিক চামগুৰি বিল এতিয়া চৰম সংকটৰ গৰাহত।
যোৱা কিছুদিন ধৰি ঘোঁৰাৰ খোৰা সদৃশ আকৃতিৰ বৃহৎ মাটি-কালিৰে আগুৰা বিলখনত ৰহস্যজনক কাৰণত ইয়াৰ পৰিচয় স্বৰূপ কৰতী মাছৰ লগতে আন প্ৰজাতিৰো বহু সংখ্যক মাছৰ মৃত্যু হোৱাক কেন্দ্ৰ কৰি সম্প্ৰতি স্থানীয় ৰাইজৰ লগতে প্ৰকৃতিপ্ৰেমী সকল চিন্তিত হৈ পৰিছে।
বৰ্তমান মহলদাৰৰ তদাৰকত থকা চৰকাৰী বিলখনৰ পানীৰ বৰণ প্ৰায় ক’লা হৈ পৰা পৰিলক্ষিত হৈছে। একাংশৰ মতে, বিলখন পৰিস্কাৰ কৰাৰ নামত চৰকাৰী পুঁজি আৱণ্টিত হয় যদিও ডাকত লোৱা পক্ষ আৰু মহলদাৰৰ অনীহাৰ ফলত চলিত বছৰত বিলখনৰ মেতেকা তথা অলাগতিয়াল জাৱৰ পৰিস্কাৰ নকৰাত প্ৰখৰ ৰ’দত পচি সেইসমূহে ইয়াৰ জলৰাশি দূষিত কৰি তোলাত অস্বাভাৱিকভাৱে মৃত্যু হৈছে বহু সংখ্যক মাছৰ।
আনহাতে, চৰকাৰী নীতি-নিয়ম অৱজ্ঞা কৰি দিনদুপৰতে একাংশ অসাধু লোকে অবাধে বিলখনত মাছৰ চিকাৰ কৰি আহিছে, ইয়াৰ লগতে আছে নিতৌ নিক্ষেপ কৰা ঘৰৰ পেলনীয়া জাৱৰৰ তথা সমীপৰ কেইবাখনো চাহ বাগিচাৰ পৰা ভেটা ভাঙি সোমাই অহা ঔষধযুক্ত পানীৰ প্ৰভাৱ।
এইদৰে থাকিলে বিলখনলৈ অহা বিভিন্ন প্ৰজাতিৰ স্থানীয় তথা পৰিভ্ৰমী চৰাইৰ প্ৰতি চূড়ান্ত ভাবুকি আহি পৰাটো নিশ্চিত বুলি প্ৰকৃতিপ্ৰমী সকলে মত প্ৰকাশ কৰিছে।
ইমানৰ পিছতো মহলদাৰ, বিলখন ডাকত লোৱা পক্ষ তথা মীন বিভাগে এইক্ষেত্ৰত কিবা ব্যৱস্থা গ্ৰহণ কৰাৰ পৰিৱৰ্তে দেখিও নেদেখাৰ ভাও জুৰি বহি থকা কাৰ্যক সচেতন মহলে সহজভাৱে ল’ব পৰা নাই।
