ধৰ্ষণত অভিযুক্ত, বিগত প্ৰায় পাঁচ মাহ ধৰি পলাই থকা নগাঁও জিলাৰ চামগুৰি আৰক্ষী থানাৰ অন্তৰ্গত বাজিয়াগাঁও নিবাসী হজৰত আলীৰ পুত্ৰ মৰম আলী (২৭) নামৰ যুৱকজনক কালি অৰ্থাৎ শুকুৰবাৰে নিশা আৰক্ষীয়ে আটক কৰিবলৈ সক্ষম হয়।
প্ৰাপ্ত তথ্য মতে এক গোপন সূত্ৰৰ ভিত্তিত যোৱা নিশা প্ৰায় ১২ বজাত চামগুৰি আৰক্ষীয়ে নিজ গৃহৰ পৰা মৰম আলীক আটক কৰে।
উল্লেখযোগ্য যে বাজিয়াগাঁৱত প্ৰায় এবছৰৰ পূৰ্বে গাওঁখনৰ এগৰাকী ২৪ বছৰীয়া গাভৰু ধৰ্ষণৰ বলি হৈ পৰৱৰ্তী সময়ত অন্তসত্ত্বা হ’বলগীয়া হৈছিল। পিছত যুৱতী গৰাকীয়ে পৰিয়ালক সবিশেষ অৱগত কৰাত পৰিয়ালৰ লোকে চামগুৰি থানাত মৰম আলীৰ বিৰুদ্ধে এজাহাৰ দাখিল কৰিছিল।
তেতিয়াৰ পৰাই মৰম আলী পলাই আছিল যদিও কালি আৰক্ষীয়ে তেওঁক আটক কৰিবলৈ সক্ষম হয়। আজি ভাৰতীয় দণ্ডবিধিৰ ৩৭৬ নং আৰু ৪০৬ নং ধাৰাৰ অধীনত ২২৫/১৯ নম্বৰৰ এটা গোচৰ ৰুজু কৰি আৰক্ষীয়ে তেওঁক জে’ল হাজোতলৈ প্ৰেৰণ কৰে।
আনহাতে, অন্তসত্বা হোৱা গাভৰু গৰাকীয়ে এটি সন্তান জন্ম দিয়া বুলি জানিব পৰা গৈছে। ডি এন এ টেষ্টৰ প্ৰতিবেদনেৰ পিছতহে অভিযুক্ত মৰম আলী প্ৰকৃততে কিমান দোষী জানিব পৰা যাব।
