অসমৰ আন এগৰাকী প্ৰবীণ তথা বিশিষ্ট কণ্ঠশিল্পী সমৰ হাজৰিকা অসুস্থ হৈ পৰিছে। গুৰুতৰ অসুস্থতাৰ বাবে শিল্পীগৰাকীক সোমবাৰে গুৱাহাটীস্থিত এখন ব্যক্তিগত খণ্ডৰ চিকিৎসালয় হায়াত ছুপাৰস্পেচিয়েলিটি হাস্পাতালত ভৰ্তি কৰোৱা হয়।
সমৰ হাজৰিকা প্ৰথিতযশা সংগীত শিল্পী ডঃ ভূপেন হাজৰিকাৰ কনিষ্ঠ ভাতৃ। অনাতাঁৰ কেন্দ্ৰ আৰু বিভিন্ন এলবামৰ বাবে গীত গোৱাৰ উপৰিও, তেওঁ বহুকেইখন অসমীয়া চলচ্চিত্ৰত নেপথ্য কণ্ঠশিল্পী হিচাপেও অমূল্য বৰঙণি আগবঢ়াইছে।
শিল্পীগৰাকীক মুখ্যতঃ শ্বাস-প্ৰশ্বাসজনিত গুৰুতৰ সমস্যাৰ বাবে ভৰ্তি কৰোৱা হৈছিল। তেওঁৰ চিকিৎসক ডাঃ প্ৰজ্ঞান কলিতাই ‘নৰ্থ ইষ্ট নাও’ক জনোৱা মতে, সমৰ হাজৰিকা আগৰ পৰাই হৃদৰোগত আক্ৰান্ত হৈ আছিল। বৰ্তমান তেওঁৰ হাওঁফাওঁৰ জটিলতা ধৰা পৰাত তেওঁক প্ৰথমে বাইপেপ ভেন্টিলেটৰৰ সহায়ত ৰখা হৈছিল।
ডাঃ কলিতাৰ মতে, বৰ্তমান শিল্পীগৰাকীৰ স্বাস্থ্যৰ উন্নতি হৈছে। তেওঁ এতিয়া কথা-বতৰা পাতিব পাৰিছে আৰু লাহে লাহে সুস্থিৰ অৱস্থালৈ ঘুৰি আহিছে বুলিও চিকিৎসকৰ দলটোৱে নিশ্চিত কৰিছে।
