জয় গুৰু শংকৰ সৰ্ব্ব গুণাকৰ
জাকেৰি নাহিকে উপাম।
তোহাৰি চৰণে ৰেণু শত কৌটি
বাৰেক কৰোহোঁ প্ৰণাম।।
অসমৰ জাতীয় জীৱনৰ চিৰস্মৰণীয় যুগপুৰুষ, নৱ বৈষ্ণৱ আন্দোলনৰ প্ৰৱৰ্তক তথা অসমীয়া সাহিত্য-সংস্কৃতিকে ধৰি সমাজ জীৱনক স্বকীয় মহিমাৰে উদ্ভাসিত কৰি থৈ যোৱা মহাপুৰুষ শ্ৰীমন্ত শংকৰদেৱৰ আজি ৪৫৬ সংখ্যক তিৰোভাৱ তিথি। সমগ্ৰ অসমৰ লগতে দেশৰ বিভিন্ন প্ৰান্ততো তিৰোভাৱ তিথিত মহাপুৰুষগৰাকীলৈ শ্ৰদ্ধাঞ্জলি জনোৱা হৈছে।
ৰাজ্যৰ বিভিন্ন প্ৰান্তৰ কীৰ্তন ঘৰ, নামঘৰকে ধৰি বিভিন্ন অনুষ্ঠান-প্ৰতিষ্ঠানে মহাপুৰুষগৰাকীৰ অতুলনীয় সৃষ্টি ৰাজিৰ আলোকত জাতীয় পৰিচয়ৰ মাজেৰে আত্মদৰ্শনৰ প্ৰয়াস কৰিছে।
এক কাল সন্ধিক্ষণত ১৪৪৯ খ্ৰীষ্টাব্দত নগাঁৱৰ বৰদোৱাৰ আলিপুখুৰীত জন্ম লভিছিল শ্ৰীমন্ত শংকৰদেৱে। নৱ বৈষ্ণৱ আন্দোলনেৰে অসমীয়া সমাজক এক ন পথৰ সন্ধান দিয়া মহাপুৰুষগৰাকীয়ে ধৰ্ম প্ৰচাৰৰ অচিলাৰেই অসমীয়া সমাজত এক সংস্কাৰবাদী আন্দোলনৰো সূচনা কৰে।
অন্ধবিশ্বাস, কুসংস্কাৰ, জাতি বিদ্বেষ, ধৰ্মীয় বিভেদৰ কাঠামোত আঘাত সানি গুৰুজনাই সমৃদ্ধ কৰি তোলে অসমীয়া জাতিক। বৰগীত, ভটিমা, কীৰ্তন-দশম, নাট-ভাওনা, নামঘৰ আদিৰ দ্বাৰা অসমীয়া জাতিৰ সাহিত্য-সংস্কৃতিৰ প্ৰাণ প্ৰতিষ্ঠা কৰি শংকৰদেৱে গঢ়ি গৈছে অসমীয়া জাতিৰ পৰিচয়।
‘কুকুৰ শৃগাল গৰ্দ্দভৰো আত্মাৰাম৷ জানিয়া সৱাকো পৰি কৰিবা প্ৰণাম৷৷’- এয়াই আছিল মহাপুৰুষগৰাকীৰ চিন্তন তথা দৰ্শন। এই চিন্তনেৰেই অসমৰ বিভিন্ন জাতি-জনগোষ্ঠীৰ মাজত সমন্বয়ৰ সেতু সাজি, উচ্চ-নীচ ভেদাভেদৰ অৱসান ঘটাই একতাৰ ডোলেৰে বান্ধি গৈছে অসমীয়া জাতিক।
একেধাৰে ধৰ্ম প্ৰচাৰক, সমাজ সংস্কাৰক, সমাজ সংগঠক, সুগায়ক, অভিনেতা, কবি, চিত্ৰকৰ লগতে অসমীয়া জাতি-সাহিত্য-সংস্কৃতিৰ নিৰ্মাতা সৰ্বগুণাকৰ শংকৰদেৱে স্বকীয় মহিমাৰে উদ্ভাসিত কৰি গৈছে অসমীয়া সমাজ জীৱনক। শংকৰদেৱৰ আদৰ্শৰ ভেটিতে থিত লৈ আছে অসমীয়া জাতিৰ শাহ।
গুৰুজনাৰ সন্দৰ্ভত জ্যোতিপ্ৰসাদ আগৰৱালাই কৈছিল, “আজিলৈকে অসমীয়াক অসমীয়া কৰি থৈছে কোনে? আমাক আজি অসমীয়া বুলি আমাৰ জাতীয় সভ্যতা-সংস্কৃতিৰে বিশিষ্টভাৱে এটা প্ৰগতিশীল জাতিকৈ ৰাখি থৈ যাওঁতা, অসমীয়া সংস্কৃতি সৃষ্টি কৰি দিওঁতা, অসমীয়া সুকুমাৰ কলাক এটা নিজস্ব বৈশিষ্ট্য দি থৈ যাওঁতা, অসমীয়া সামাজিক জীৱনক এটা বিশিষ্ট গঢ় দি যাওঁতা, অসমত সাংস্কৃতিক ৰাষ্ট্ৰ প্ৰতিষ্ঠা কৰি থৈ যাওঁতা, অসমীয়া জীৱনৰ মহা কলাকাৰ শিল্পীৰো শিল্পী মহাপুৰুষ শ্ৰীমন্ত শঙ্কৰদেৱ।”
মহাপুৰুষগৰাকীৰ তিৰোভাৱ তিথিত আজি সমাজৰ বিভিন্ন শ্ৰেণীৰ লোকে মহাপুৰুষগৰাকীৰ শ্ৰদ্ধাঞ্জলি জনোৱাৰ লগতে তেওঁৰ অপূৰ্ব সৃষ্টিৰাজিৰ মাজত ভুমুকি মাৰি চৰ্চাৰ পৰিৱেশ গঢ়ি তোলা দেখা গৈছে। সামাজিক মাধ্যমৰ জৰিয়তে বিভিন্নজনে মহাপুৰুষগৰাকীৰ ৰচনাৰ অংশ তুলি আনি স্মৰণ কৰিছে।
ইপিনে, আজি কোচবিহাৰৰ মধুপুৰ সত্ৰতো মহাপুৰুষ শ্ৰীমন্ত শঙ্কৰদেৱৰ তিৰোভাৱ তিথি বিভিন্ন কাৰ্য্যসূচীৰে পালন কৰিবলৈ ব্যাপক প্ৰস্তুতি চলোৱা হৈছে।
