সংগীত জগতক উকা কৰি বিদায় ল’লে কিংবদন্তী সন্তুৰবিদ পণ্ডিত শিৱকুমাৰ শৰ্মাই
ভাৰতীয় ধ্ৰুপদী সংগীত জগতৰ অন্যতম পুৰোধা, কিংবদন্তী সংগীতজ্ঞ সন্তুৰ বাদক পণ্ডিত শিৱকুমাৰ শৰ্মাই আজি ৮৪ বছৰ বয়সত শেষ নিশ্বাস ত্যাগ কৰে।
জম্মুত জন্মগ্ৰহণ কৰা পণ্ডিত শিৱকুমাৰ শৰ্মাই তেৰ বছৰ বয়সত সন্তুৰ বাদ্য শিকিবলৈ আৰম্ভ কৰিছিল। ১৯৫৫ চনত মুম্বাইত তেওঁ প্ৰথম ৰাজহুৱাভাৱে প্ৰদৰ্শন আগবঢ়ায়।
পণ্ডিত শিৱকুমাৰ শৰ্মাই ১৯৫৬ চনৰ ‘ঝনক ঝনক পায়েল বাজে’ চলচ্চিত্ৰৰ এটা দৃশ্যৰ বাবে নেপথ্য সংগীত ৰচনা কৰিছিল। চাৰি বছৰৰ পিছত পণ্ডিত শিৱকুমাৰ শৰ্মাই তেওঁৰ প্ৰথমখন একক এলবাম ৰেকৰ্ড কৰে।
পণ্ডিত শিৱকুমাৰ শৰ্মাই প্ৰখ্যাত বাঁহীবাদক হৰিপ্ৰসাদ চৌৰাছিয়া আৰু গিটাৰবাদক ব্ৰজ ভূষণ কাবৰাৰ সৈতে বিখ্যাত ‘কল অফ দ্য ভেলী’ শীৰ্ষক এলবাম প্ৰযোজনা কৰিছিল।
হৰিপ্ৰসাদ চৌৰাছিয়াৰ সৈতে যুটীয়াভাৱে চিলচিলা, চান্দনীৰ, ডাৰকে ধৰি কেইবাখনো হিন্দী চলচ্চিত্ৰৰ বাবে সংগীত ৰচনা কৰিছিল শিৱকুমাৰ শৰ্মাই।
পণ্ডিত শিৱকুমাৰ শৰ্মা ১৯৯১ চনত সন্মানীয় পদ্মশ্ৰী আৰু ২০০১ চনত পদ্ম বিভূষণ সন্মানেৰে সন্মানিত হৈছিল।