কেন্দ্ৰীয় মন্ত্ৰী সৰ্বানন্দ সোণোৱালে মঙলবাৰে অসমৰ ৰাজ্যসভা উপ-নিৰ্বাচনৰ বাবে মনোনয়ন পত্ৰ দাখিল কৰে।
সোণোৱালে অসম বিধানসভা সচিবালয়ত মুখ্যমন্ত্ৰী হিমন্ত বিশ্ব শৰ্মা, বিজেপিৰ ৰাজ্যিক সভাপতি ভৱেশ কলিতা, কৃষিমন্ত্ৰী তথা অগপৰ সভাপতি অতুল বৰা, হস্ততাঁত বিভাগৰ মন্ত্ৰী উৰ্খাও গৌৰা ব্ৰহ্ম আৰু জলসম্পদ মন্ত্ৰী পীযুষ হাজৰিকাৰ উপস্থিতিত তেওঁৰ মনোনয়ন পত্ৰ দাখিল কৰে।
বিটিচিৰ মুৰব্বী তথা ইউপিপিএলৰ সভাপতি প্ৰমোদ বড়ো আৰু ৰাজ্যসভাৰ সাংসদ ভুৱনেশ্বৰ কলিতাও কেন্দ্ৰীয় মন্ত্ৰী সোণোৱালৰ মনোনয়ন পত্ৰ দাখিলৰ সময়ত উপস্থিত থাকে।
কেন্দ্ৰীয় জাহাজ, বন্দৰ, জলপৰিবহন তথা আয়ুস বিভাগৰ মন্ত্ৰীগৰাকী বৰ্তমান মাজুলী বিধানসভা সমষ্টিৰ বিধায়ক হৈ আছে।
উল্লেখ্য যে মোদী চৰকাৰৰ প্ৰথমটো কাৰ্যকালত সোণোৱালে ক্ৰীড়া বিভাগৰ কেন্দ্ৰীয় ৰাজ্যমন্ত্ৰী হিচাপে কাৰ্যনিৰ্বাহ কৰিছিল।
সোণোৱালে ২০১৬ চনৰ অসম বিধানসভা নিৰ্বাচনত বিজেপিক নেতৃত্ব দিছিল।
মাজুলীৰ বিধায়ক হিচাপে নিৰ্বাচিত হোৱাৰ পাছত তেওঁ অসমত বিজেপি নেতৃত্বাধীন চৰকাৰৰ প্ৰথমগৰাকী মুখ্যমন্ত্ৰী হয়।
বৰ্তমান কেন্দ্ৰীয় মন্ত্ৰী হিচাপে কাৰ্যকাল চলাই নিবলৈ সোণোৱালৰ বাবে ৰাজ্যসভালৈ নিৰ্বাচিত হোৱা প্ৰয়োজন।
অসমত ৰাজ্যসভাৰ উপ-নিৰ্বাচনটো অহা ৪ অক্টোবৰত অনুষ্ঠিত হ’ব।
বিজেপি সদস্য বিশ্বজিৎ দৈমাৰীয়ে ৰাজ্যসভাৰ পৰা পদত্যাগ কৰাৰ পাছত অসমত ৰাজ্যসভাৰ উপ-নিৰ্বাচন অনুষ্ঠিত কৰা হৈছে।
