অসমত বিধানসভা নিৰ্বাচনৰ ফলাফল ঘোষণা হোৱাৰ ৭ দিনৰ পিছতো আজিলৈকে গঠন হোৱা নাই নতুন চৰকাৰ।
বিজেপি নেতৃত্বাধীন মিত্ৰজোঁটে ৭৫ খনকৈ আসন লাভ কৰাৰ পিছতো ৰাজ্যত বিজেপি শাসিত চৰকাৰ এখন গঠন কৰিব পৰা নাই গেৰুৱা দলটোৱে।
ইয়াৰ প্ৰধান কাৰণেই হৈছে মুখ্যমন্ত্ৰীৰ পদকলৈ দলটোৰ ভিতৰত সৃষ্টি হোৱা টনা-আঁজোৰা। এপিনে বৰ্তমানৰ স্বাস্থ্যমন্ত্ৰী হিমন্ত বিশ্ব শৰ্মা মুখ্যমন্ত্ৰী পদৰ দাবীদাৰ হোৱাৰ লগতে মুখ্যমন্ত্ৰী সৰ্বানন্দ সোণোৱালো একে শাৰীতে আছে।
সেইবাবেই আজি দিল্লীলৈ দুয়োগৰাকী নেতাকে মতাই নিবলগীয়া হ’ল বিজেপিৰ শীৰ্ষ নেতৃত্বই।তিনি লানি আলোচনাৰ পিছতো পিছে আজি নোলাল সমস্যাটোৰ সমাধান সূত্ৰ।
এনে সময়তে অসমৰ পৰৱৰ্তী মুখ্যমন্ত্ৰী হিচাবে ৰাজ্যবাসীয়ে কাক কিমান পছন্দ কৰে সেই বিষয়ত দেশৰ প্ৰখ্যাত সমীক্ষা প্ৰতিষ্ঠান Lokniti-CSDS-এ এটা সমীক্ষা প্ৰকাশ কৰিছে।
Lokniti-CSDS ৰ সমীক্ষাত প্ৰকাশ পোৱা অনুসৰি ৰাজ্যৰ বেছি সংখ্যক লোকেই মুখ্যমন্ত্ৰী হিচাবে সৰ্বানন্দ সোণোৱালকে বিচাৰে। অৱশ্যে জনপ্ৰিয়তাৰ দিশৰ পৰা ২০১৬ চনত সৰ্বানন্দ সোণোৱাল আৰু হিমন্ত বিশ্ব শৰ্মাৰ মাজত যি ব্যৱধান আছিল সেই ব্যৱধান বৰ্তমান লক্ষ্যণীয় ভাবে হ্ৰাস পাইছে।
সমীক্ষা অনুসৰি চাৰিজন লোকৰ ভিতৰত এজনে (২৩ শতাংশ) সৰ্বানন্দ সোণোৱালক পুনৰ মুখ্যমন্ত্ৰী হিচাবে বিচাৰে। আনহাতে ১১ শতাংশ লোকে হিমন্ত বিশ্ব শৰ্মাক মুখ্যমন্ত্ৰীৰ চকীত বহাটো বিচাৰে। Lokniti-CSDS –এ ২০১৬ চনত প্ৰকাশ কৰা সমীক্ষাত ৩০ শতাংশ লোকে সৰ্বানন্দ সোণোৱালক আৰু মাত্ৰ ৪ শতাংশ লোকেহে হিমন্ত বিশ্ব শৰ্মাক মুখ্যমন্ত্ৰী হিচাবে বিচাৰিছিল।
এইবাৰ দুয়োগৰাকী নেতাৰ মাজত জনপ্ৰিয়তাৰ ব্যৱধান ১২ শতাংশ হ্ৰাস পাইছে।সমীক্ষাত প্ৰকাশ পোৱা অনুসৰি নামনি অসমৰ ১৬ শতাংশ লোকে হিমন্ত বিশ্ব শৰ্মাক মুখ্যমন্ত্ৰী হিচাবে বিচাৰে।
একেদৰে ১৯ শতাংশ লোকে সৰ্বানন্দ সোণোৱালক মুখ্য মন্ত্ৰী হিচাবে পাব বিচাৰে।উজনি অসমত ২৮ শতাংশ লোকে সোণোৱালক আৰু ৬ শতাংশ লোকে হিমন্ত বিশ্ব শৰ্মাক মুখ্যমন্ত্ৰী হিচাবে পাব বিচাৰে।
Lokniti-CSDSৰ সমীক্ষা মতে বৰাক উপত্যকাৰ ২২ শতাংশই সোণোৱালক আৰু ৯ শতাংশই হিমন্ত বিশ্বক মুখ্যমন্ত্ৰীৰ ৰূপত পাব বিচাৰে।
অৱশ্যে সকলো কথা নিৰ্ভৰ কৰিব কাইলৈ গুৱাহাটীত অনুষ্ঠিত হ’বলগীয়া বিজেপি বিধায়িনী দলৰ বৈঠকৰ সিদ্ধান্তৰ ওপৰত। এতিয়া কেৱল মাত্ৰ অপেক্ষা।