ছুপাৰ ৫০০ ছিৰিজৰ খিতাপ দখল কৰি ইতিহাস গঢ়িলে ৰংকি-চিৰাগে; হিমন্তৰ অভিনন্দন
আজিৰ দিনটো ভাৰতীয় বেডমিণ্টনৰ বাবে ঐতিহাসিক দিন। ছুপাৰ ৫০০ ছিৰিজ টুৰ্ণামেণ্টৰ ডাবলছ শাখাত প্ৰথমবাৰৰ বাবে ভাৰতীয় শ্বাটলাৰে চেম্পিয়নৰ খিতাপ দখল কৰিবলৈ সক্ষম হৈছে।
থাইলেণ্ড অ’পেনৰ পুৰুষৰ ডাবলছ শাখাত ভাৰতীয় যুটি ছটাৱিকচৈৰাজ ৰংকিৰেড্ডি আৰু চিৰাগ ছেট্টীয়ে চীনা যুটি লী জুং হুই আৰু লিউ য়ু চেনক পৰাস্ত কৰি এই বিৰল কৃতিত্বৰ অধিকাৰী হয়।
আজি অনুষ্ঠিত হোৱা টুৰ্ণামেণ্টৰ ফাইনেলত ভাৰতৰ যুটিটোৱে চীনা যুটিক কঠিন প্ৰত্যাহ্বানৰ অন্তত ২১-১৯, ১৮-২১ আৰু ২১-১৮ৰ ব্যৱধানত পৰাস্ত কৰিবলৈ সক্ষম হয়।
বেংককৰ হ’মাৰ্ক ইণ্ডোৰ ষ্টেডিয়ামত ১ ঘণ্টা ২ মিনিট ধৰি চলা মেচখনত জয়ী হৈ উৎফুল্ল হৈ পৰে ৰংকিৰেড্ডি আৰু ছেট্টী।
ইফালে এই ঐতিহাসিক বিজয়ৰ পাছতে ভাৰতীয় বেডমিণ্টন সন্থাৰ সভাপতি হিমন্ত বিশ্ব শৰ্মাই টুইটাৰ যোগে দুয়োগৰাকী শ্বাটলাৰকে অভিনন্দন জনায়।
তেওঁ টুইটোৰ জৰিয়তে কয় যে বিশ্ব চেম্পিয়ন যুটিক পৰাস্ত কৰি থাইলেণ্ড অ’পেন ছুপাৰ ৫০০ৰ দৰে সন্মানীয় প্ৰতিযোগিতাৰ চেম্পিয়নৰ খিতাপ দখল কৰা প্ৰথম ভাৰতীয় ডাবলছ যুটি ছটাৱিকচৈৰাজ আৰু চিৰাগ ছেট্টীক অভিনন্দন।
হিমন্তৰ উপৰি ভাৰতীয় বেডমিণ্টনত ইতিহাস ৰচা এই দুয়োগৰাকী শ্বাটলাৰকে বিভিন্ন ক্ৰীড়া ক্ষেত্ৰৰ লগত জড়িত ব্যক্তিয়ে ছ’চিয়েল মাধ্যমৰ জৰিয়তে অভিনন্দন জ্ঞাপন কৰিছে।
Indian shuttlers soar, create history.
Congratulations @satwiksairaj & @Shettychirag04 🇮🇳 on becoming 1st Indian Doubles Pair to win a prestigious championship like #ThailandOpenSuper500 by defeating world champions Li Junhui & Liu Yuchen.
Great moment for Indian Badminton. pic.twitter.com/ZWhCIAsYo3
— Himanta Biswa Sarma (@himantabiswa) August 4, 2019