ছৌদি আৰৱৰ পৰা পাকিস্তানলৈ ঘূৰাই পঠিওৱা হৈছে ৫ হাজাৰৰো অধিক ভিক্ষাৰী। কেৱল সেয়াই নহয়, আন পাঁচখন দেশত ভিক্ষাৰ অভিযোগত আৰু ৩৬৯জন পাকিস্তানী নাগৰিকক গ্ৰেপ্তাৰ কৰা হৈছে। যোৱা ১৬ মাহৰ এই পৰিসংখ্যা পাকিস্তানৰ গৃহ মন্ত্ৰালয়ে নিজেই প্ৰকাশ কৰিছে।
বুধবাৰে পাকিস্তানৰ ৰাষ্ট্ৰীয় সংসদত এই চাঞ্চল্যকৰ তথ্য প্ৰদান কৰে গৃহমন্ত্ৰী মহছিন নাকভিয়ে। পাকিস্তান পিপলছ পাৰ্টিৰ সাংসদ ছাহাৰ কামৰাণৰ এক প্ৰশ্নৰ লিখিত উত্তৰত তেওঁ এই তথ্য দাঙি ধৰে।
ছৌদি আৰৱত ভিক্ষা নিষিদ্ধ
ছৌদি আৰবে ভিক্ষাৰ বিৰুদ্ধে অতি কঠোৰ স্থিতি গ্ৰহণ কৰিছে। সেই দেশত চৰকাৰে ভিক্ষা কৰাটো সম্পূৰ্ণ নিষিদ্ধ। ছৌদি প্ৰশাসনে ‘ভিক্ষা বিৰোধী আইন’ৰ অধীনত ভিক্ষা কৰাটো অপৰাধ বুলি বিবেচনা কৰে। কেৱল স্থানীয় বাসিন্দাসকলেই নহয়, এই কামত লিপ্ত হোৱা বিদেশী নাগৰিকসকলেও কঠোৰ শাস্তিৰ সন্মুখীন হ’বলগীয়া হয়। জৰিমনা আৰু কাৰাদণ্ডৰ উপৰিও বিদেশী নাগৰিকক বিতাড়িত কৰা হয়।
পাকিস্তানৰ আৰ্থিক সংকট
বৰ্তমান পাকিস্তানৰ অৰ্থনীতি ভয়াৱহ সংকটত পৰিছে। মূল্যবৃদ্ধি, ইন্ধনৰ দাম, খাদ্যৰ নাটনি। এই পৰিস্থিতিত সাধাৰণ মানুহৰ জীৱন অসহ্যকৰ হৈ পৰিছে। চাকৰিৰ অভাৱ আৰু সামাজিক সুৰক্ষা ব্যৱস্থাৰ পতনৰ বাবে বহু লোকে বিদেশলৈ গৈ ভিক্ষা খুজিবলৈ বাধ্য হৈছে। আনুষ্ঠানিক বা কাৰিকৰী শিক্ষাৰ অভাৱৰ বাবে তেওঁলোকে বিদেশত চাকৰি বিচাৰি ল’বলৈও সক্ষম হোৱা নাই।
বিশেষজ্ঞসকলৰ মতে এই পৰিস্থিতিৰ অন্যতম মূল কাৰণ হৈছে দুৰ্নীতি, দুৰ্বল শিক্ষা ব্যৱস্থা, ৰাজনৈতিক অস্থিৰতা, আন্তঃৰাষ্ট্ৰীয় ঋণৰ বোজা। দিনক দিনে বৃদ্ধি পাইছে পাকিস্তানৰ আন্তঃৰাষ্ট্ৰীয় ঋণ। আৰু এই হেঁচা দূৰ কৰিবলৈ চৰকাৰে অত্যাৱশ্যকীয় সামগ্ৰীৰ ওপৰত কৰ আৰোপ কৰিছে। ফলত সাধাৰণ মানুহ দিশহাৰা হৈ পৰিছে।
ভিক্ষা বৃত্তিৰ পৰিণতি
অৰ্থনৈতিক দুৰ্দশাৰ বাবে বহু লোকে উন্নত জীৱনৰ আশাত মধ্যপ্ৰাচ্যলৈ যায়। কিন্তু কাম বিচাৰি নাপাই অবৈধভাৱে ধন উপাৰ্জনৰ চেষ্টা কৰিবলৈ বাধ্য হয়।
বিশেষকৈ ছৌদি আৰৱৰ দৰে দেশত সামাজিক ব্যৱস্থা বজাই ৰখাৰ ক্ষেত্ৰত কোনো আপোচ কৰা নহয়। তাত এই ধৰণৰ কাম কৰাৰ পৰিণতি ভয়ানক।
এই ঘটনাৰ পিছত পাকিস্তানী সমাজ আৰু ৰাজনীতিত পুনৰ প্ৰশ্ন উত্থাপন হ’বলৈ আৰম্ভ কৰিছে- এই আৰ্থিক দুৰ্দশাৰ পৰা তেওঁলোক কেতিয়া মুক্ত হ’ব? সচাকৈয়ে চৰকাৰে পৰৱৰ্তী প্ৰজন্মৰ উপযুক্ত শিক্ষা আৰু প্ৰশিক্ষণৰ ওপৰত গুৰুত্ব আৰোপ কৰিছেনে? এই প্ৰশ্নৰ স্পষ্ট উত্তৰ এতিয়াও নাই।
