কোনো বিশেষ সম্প্ৰদায়ক লক্ষ্য কৰি ঘৃণাভৰা ভাষণ দিয়া অপৰাধীৰ ধৰ্মলৈ নোচোৱাকৈ পদক্ষেপ গ্ৰহণৰ নিৰ্দেশ দিলে উচ্চতম ন্যায়ালয়ে। উচ্চতম ন্যায়ালয়ে শুকুৰবাৰে দেশত ঘৃণামূলক ভাষণৰ বিষয়ত উদ্বেগ প্ৰকাশ কৰি কয় “ধৰ্মৰ নামত আমি ক’ত উপনীত হৈছো” ।
ন্যায়ালয়ে এনে ভাষণৰ সৈতে জৰিতসকলৰ আৰু ধৰ্মৰ প্ৰতি দৃষ্টি নিদিয়াকৈ অপৰাধীৰ বিৰুদ্ধে স্বতঃস্ফূৰ্ত ব্যৱস্থা গ্ৰহণৰ নিৰ্দেশ দিয়ে। ন্যায়াধীশ কে এম যোচেফ আৰু হৃষীকেশ ৰয়ৰ বিচাৰপীঠে কয় যে ঘৃণামূলক ভাষণ “ভয়াৱহ”, বিশেষকৈ গণতান্ত্ৰিক আৰু ধৰ্ম-নিৰপেক্ষ এখন দেশৰ বাবে এয়া ভয়ংকৰ কথা। তেওঁ কয় “আমি ক’ত উপনীত হৈছো? আমি ধৰ্মক কিহলৈ অৱনমিত কৰিছোঁ? এয়া দুখজনক কথা”। বিচাৰপীঠে দিল্লী, উত্তৰ প্ৰদেশ আৰু উত্তৰাখণ্ড আৰক্ষীকো জাননী জাৰি কৰি তেনে ৰাজ্যসমূহত ঘটা এনে অপৰাধৰ বিৰুদ্ধে কি ব্যৱস্থা লোৱা হৈছে সেই সন্দৰ্ভত প্ৰতিবেদন দাখিল কৰিবলৈ নিৰ্দেশ দিয়ে। আদালতে ৰাজ্য চৰকাৰ আৰু আৰক্ষী কৰ্তৃপক্ষই ঘৃণাভৰা ভাষণৰ ক্ষেত্ৰত আনুষ্ঠানিক অভিযোগ পঞ্জীয়ন হোৱালৈ অপেক্ষা নকৰাকৈ স্বতঃপ্ৰণোদিত ব্যৱস্থা গ্ৰহণ কৰিব লাগে বুলিও কয়। আদালতে লগতে কয় যে চৰকাৰে অপৰাধীসকলৰ ধৰ্মলৈ নোচোৱাকৈ তেওঁলোকৰ বিৰুদ্ধে ব্যৱস্থা ল’ব লাগে।
শীৰ্ষ ন্যায়ালয়ে আজি ভাৰতত মুছলমান সম্প্ৰদায়ক লক্ষ্য কৰি দিয়া ঘৃণা ভৰা ভাষণ বন্ধ কৰিবলৈ আদালতৰ জৰুৰী হস্তক্ষেপ বিচাৰি এখন আবেদনৰ শুনানি গ্ৰহণ কৰিছিল। সাংবাদিক শ্বাহিন আব্দুল্লাই দাখিল কৰা আবেদনখনত কেন্দ্ৰ আৰু ৰাজ্য চৰকাৰক ঘৃণামূলক অপৰাধ আৰু ঘৃণামূলক ভাষণৰ ঘটনাৰ এক স্বতন্ত্ৰ, বিশ্বাসযোগ্য আৰু নিৰপেক্ষ তদন্ত আৰম্ভ কৰিবলৈ নিৰ্দেশ বিচাৰি আদালতৰ হস্তক্ষেপ কামনা কৰিছিল।
উল্লেখ্য চলিত বৰ্ষৰ জানুৱাৰী মাহত ‘ধৰ্ম সংসদ’ত একাংশ বক্তাই দিয়া উচটনিমূলকআৰু ঘৃণা ভৰা ভাষণক দেশজুৰি প্ৰতিক্ৰিয়াৰ সৃষ্টি হৈছিল।।
এনে ভাষণৰ বিৰুদ্ধেদেশৰ বিভিন্ন প্ৰান্তৰ লগতে নতুন দিল্লীৰ উত্তৰাখণ্ড ভৱনৰ বাহিৰত একাংশ লোকে প্ৰতিবাদ সাব্যস্ত কৰিছিল।
সশস্ত্ৰ বাহিনীৰ পাঁচজন প্ৰাক্তন মুৰব্বী আৰু আমোলাসহ আন কেইবাজনো বিশিষ্ট নাগৰিকে ঘৃণামূলক ভাষণৰ ঘটনা সন্দৰ্ভত তেতিয়াৰ ৰাষ্ট্ৰপতি ৰামনাথ কোবিন্দ আৰু প্ৰধানমন্ত্ৰী নৰেন্দ্ৰ মোদীলৈ এখন পত্ৰ লিখিছিল আৰু এই বিষয়ত উপযুক্ত ব্যৱস্থা ল’বলৈ আহ্বান জনাইছিল।
পত্ৰ খনত হৰিদ্বাৰত এক অনুষ্ঠানত কৰা সাম্প্ৰদায়িক মন্তব্যৰ কথা উল্লেখ কৰা হৈছিল আৰু এনে ধৰণৰ প্ৰোচনামূলক মন্তব্যই দেশেত সাম্প্ৰদায়িক সম্প্ৰীতি বিনষ্ট কৰিব বুলি আশংকা কৰা হৈছিল।
পত্ৰ খনত কোৱা হৈছিল —’আমি ঘৃণা ভৰা এনে ধৰণৰ হিংসাত্মক প্ৰৰোচনাক সমৰ্থন জনাব নোৱাৰো – এনে মন্তব্য সমূহে আভ্যন্তৰীণ নিৰাপত্তাৰ প্ৰতিও ভাবুকি কঢ়িয়াই আনিছে। তেওঁলোকে লগতে কয়, ” সীমান্তৰ সাম্প্ৰতিক পৰিস্থিতিৰ প্ৰতি লক্ষ্য ৰাখি, ৰাষ্ট্ৰৰ ভিতৰত যিকোনো শান্তি আৰু সম্প্ৰীতি ভংগ হ’লে সেই কাৰ্যই বাহ্যিক শক্তিক উৎসাহিত কৰিব।”
পত্ৰখনত স্বাক্ষৰকাৰীসকলৰ ভিতৰত আছিল নৌসেনাৰ প্ৰাক্তন মুৰব্বী এডমিৰেল (অৱসৰপ্ৰাপ্ত) এল ৰামদাস, এডমিৰেল (অৱসৰপ্ৰাপ্ত) বিষ্ণু ভাগৱত, এডমিৰেল (অৱসৰপ্ৰাপ্ত) অৰুণ প্ৰকাশ আৰু এডমিৰেল (অৱসৰপ্ৰাপ্ত) আৰ কে ধাৱান আদি ব্যক্তিসকল।
