কেৰালাৰ কেইবা শতিকা প্ৰাচীন পদ্মনাভস্বামী মন্দিৰ কোনে পৰিচালনা কৰিব সেই বিষয়ক লৈ দীৰ্ঘ দিন ধৰি বিতৰ্কৰ সৃষ্টি হৈ আহিছিল। অৱশেষত সোমবাৰে উচ্চতম ন্যায়ালয়ে পদ্মনাভস্বামী মন্দিৰ পৰিচালনাৰ দায়িত্ব ট্ৰাভাংকৰৰ ৰাজ পৰিয়ালৰ ওপৰত অৰ্পন কৰে।
উচ্চতম ন্যায়ালয়ৰ এখন বিশেষ খণ্ডপীঠে পদ্মনাভস্বামী মন্দিৰৰ চোৱা-চিতা ট্ৰাভাংকৰৰ ৰাজ পৰিয়ালে কৰিব বুলি ৰায় দান কৰি কয় যে এই ক্ষেত্ৰত ৰাজ পৰিয়ালক থিৰুৱান্তপুৰমৰ জিলা দণ্ডাধীশে সহায় কৰিব।
উচ্চতম ন্যায়ালয়ে অৱশ্যে মন্দিৰৰ ভল্ট-বি খোলাৰ প্ৰসংগত কোনো কথা উল্লেখ কৰা নাই।
শতিকা প্ৰাচীন এই মন্দিৰটো ২০১১ চনত পুনৰ বাৰ চৰ্চাৰ কেন্দ্ৰ বিন্দু হৈ পৰিছিল।
সেই সময়ত এই বুলি প্ৰকাশ পাইছিল যে পদ্মনাভস্বামী মন্দিৰৰ ভূগৰ্ভৰ চাৰিটা কোঠালিত ধন-সোণ ঠাহ খাই আছে।
মূল্যৱান ৰত্ন ভাণ্ডাৰেৰে ভৰি থকা সেই বিশেষ চাৰিটা কোঠালীক লৈ এতিয়াও কৌতূহল অব্যাহত আছে।
১৮ শতিকাত পদ্মনাভস্বামী মন্দিৰ আজি দেখা ৰুপত সাজি উলিয়াইছিল ট্ৰাভাংকৰৰ ৰাজ পৰিয়ালে।
ট্ৰাভাংকৰৰ ৰাজ পৰিয়াল সেয়ে মন্দিৰ পৰিচালনাৰ দায়িত্বত থকা উচিৎ বুলি বহুতে মন্তব্য কৰি আহিছে।
ট্ৰাভাংকৰৰ ৰাজ পৰিয়ালে ১৯৪৭ চনৰ আগলৈকে দক্ষিণ কেৰালাৰ কিছু অঞ্চল আৰু তামিলনাডুৰ কিছু অঞ্চলত শাসন কৰিছিল।