উচ্চতম ন্যায়ালয়ে ৩৭০ অনুচ্ছেদ বাতিলৰ গোচৰত ৰায়দান কৰাৰ সময়তে সংসদত আহি উপস্থিত হয় নেশ্যনেল কনফাৰেন্সৰ সভাপতি তথা শ্ৰীনগৰৰ সাংসদ ফাৰুক আব্দুল্লা। জম্মু-কাশ্মীৰৰ প্রাক্তন মুখ্যমন্ত্রীগৰাকীক এই গোচৰৰ সন্দর্ভত সোধাত তেওঁ কয় যে, “সমগ্র ৰায়দান হৈ যাওক, তাৰপিছতহে মই এই সন্দর্ভত মন্তব্য দিম৷”
দেশৰ মুখ্য ন্যায়াধীশ ডি ৱাই চন্দ্ৰচুড়ে নিজৰ ৰায়দানত কয় যে, ‘জম্মু-কাশ্মীৰৰ সংবিধানৰ উদ্দেশ্য আছিল ভাৰতৰ সৈতে ইয়াৰ সম্পৰ্ক আৰু অধিক সংজ্ঞায়িত কৰা। জম্মু-কাশ্মীৰৰো কোনো আভ্যন্তৰীণ সাৰ্বভৌমত্ব নাছিল। ইয়াৰ সংবিধান ভাৰতৰ সংবিধানৰ অধীন আছিল। ৩৭০ ধাৰা আছিল অস্থায়ী ব্যৱস্থা। ৩৭০ অনুচ্ছেদ বাতিল কৰাৰ ক্ষমতা ৰাষ্ট্ৰপতিৰ আছিল। ৩৭০ অনুচ্ছেদ বাতিল কৰাৰ পূৰ্বে জম্মু-কাশ্মীৰ সংবিধান সভাৰ পৰামৰ্শৰ প্ৰয়োজন নাছিল।’
ৰায়দানৰ সময়ত ন্যায়াধীশ চন্দ্ৰচুড়ে কয় যে, ‘ভাৰতত অন্তৰ্ভুক্ত কৰাৰ সময়ত জম্মু-কাশ্মীৰে স্বাধীনতা বা সাৰ্বভৌমত্ব বজাই ৰখা নাছিল।’
অভিযোগকাৰীসকলৰ আবেদন খাৰিজ কৰি মুখ্য ন্যায়াধীশগৰাকীয়ে লগতে কয় যে, ‘কেন্দ্ৰৰ সকলো সিদ্ধান্তক প্ৰত্যাহ্বান জনাব নোৱাৰি। ই অৰাজকতাৰ সৃষ্টি কৰিব।”
ন্যায়াধীশ চন্দ্ৰচুড়ে লগতে কয়, ‘আমি ৩৭০ নং অনুচ্ছেদক অস্থায়ী আইন হিচাপে গণ্য কৰোঁ।’
ভাৰতত যোগদান কৰাৰ পিছত জম্মু-কাশ্মীৰৰ পৃথক সাৰ্বভৌমত্বৰ কোনো প্ৰশ্নই উত্থাপন হোৱা নাই। আজি এই কথা পৰ্যবেক্ষণ কৰে ভাৰতৰ মুখ্য ন্যায়াধীশ ডি ৱাই চন্দ্ৰচুড়ে।
