শিৱসাগৰত আধাৰ কেন্দ্ৰ দিয়াৰ নামত এজন ব্যক্তিয়ে প্ৰৱঞ্চনাৰে ৪০ লাখ টকা লুটি নিয়াৰ অভিযোগ উত্থাপন হৈছে।
জিলাখনৰ ৰেডক্ৰছ ৰোড নিৱাসী প্ৰণৱ দাস নামৰ ব্যক্তিজনৰ বিৰুদ্ধে উত্থাপিত হৈছে এই গুৰুতৰ অভিযোগ।
জানিব পৰা মতে প্ৰণৱ দাসে আধাৰ কেন্দ্ৰ দিয়াৰ নামত আভুৱা ভাৰি প্ৰৱঞ্চনাৰে ধন আত্মসাৎ কৰা বুলি ৰঞ্জিৎ হাজৰিকা আৰু হিমাদ্ৰী চেতিয়া ফুকন নামৰ ব্যক্তি দুজনে শিৱসাগৰ সদৰ আৰক্ষী থানাত এজাহাৰ দাখিল কৰিছে।
আৰক্ষীয়ে অভিযোগকাৰীয়ে দিয়া এজাহাৰৰ ওপৰত ভিত্তি কৰি ১০৩৭/ ১৯ নম্বৰত ভাৰতীয় দণ্ডবিধি আইনৰ ৪০৬/৪২০/ ৫০৬ জামিনবিহীন ধাৰাত অভিযুক্তৰ বিৰুদ্ধে গোচৰ ৰুজু কৰিছে।
অভিযোগকাৰীয়ে জনোৱা মতে প্ৰৱঞ্চক প্ৰণৱক ধন ঘূৰাই দিয়াৰ কথা ক’লে ভুক্তভোগীক মাৰণাস্ত্ৰ দেখুৱাই হত্যাৰ ভাবুকি প্ৰদান কৰে। লগতে আৰক্ষীয়েও গোচৰ ৰুজু কৰাতে সীমাবদ্ধ থাকি কোনো ব্যৱস্থা গ্ৰহণ কৰা নাই বুলি ভুক্তভোগীয়ে অভিযোগ উত্থাপন কৰিছে।
