বিজেপি নেতৃত্বাধীন অসম চৰকাৰখনে শাসনভাৰ গ্ৰহণ কৰাৰ পিছতেই দুৰ্নীতিৰ বিৰুদ্ধে যি শূন্য সহনশীলতাৰ নীতি গ্ৰহণ কৰিছিল সেয়া যে বৰ্তমান ফুটুকাৰ ফেন হে তাৰ জ্বলন্ত প্ৰমাণ হৈছে মাৰ্ঘেৰিটা নগৰত নিৰ্মাণ হোৱা কোটি টকীয়া নলা প্ৰকল্পৰ কাম৷
মাৰ্ঘেৰিটা চহৰত কেন্দ্ৰীয় চৰকাৰৰ দ্বাৰা অনুমোদিত এন এল চি পি আৰ(NLCPR) আঁচনিৰ অধিনত নলা নিৰ্মাণৰ কাম চলি আছে আৰু বৰ্ত্তমান সেই কাম প্ৰায় শেষ পৰ্যায়ত৷
কিন্তু পৰিতাপৰ বিষয় এইয়ে যে- মাৰ্ঘেৰিটা নগৰৰ প্ৰায় ভাগ স্থানতে নিৰ্মাণ হোৱা নলা সমূহৰ আগ ফাল আৰু পিছ ফাল নথকা সম্পূৰ্ণ বিকল নলা৷ অতি ৰহস্য জনক ভাৱে নগৰৰ সদাব্যস্ত এলেকা ভিনিয়াৰ বজাৰতো ঠিক তেনে ধৰণৰ নলায়ে নিৰ্মাণ কৰিছে ঠিকাদাৰে৷
উত্থাপিত অভিযোগ মতে দোকানসমূহৰ সন্মুখত নিৰ্মাণ কৰা নলাৰ ওপৰত আনকি পকী শ্লেপ পৰ্যন্ত ঠিকাদাৰে নিদিয়াৰ কাৰণে বজাৰ খনত দুৰ্ঘটনাৰ সম্ভাৱনা দিনক দিনে বৃদ্ধি পাইছে৷
নিজৰ ব্যৱসায়ৰ প্ৰতি লক্ষ্য ৰাখি কিছু সংখ্যক ব্যৱসায়ীয়ে ব্যক্তিগত প্ৰচেষ্টাত পকী শ্লেপ সমূহ নিৰ্মাণ কৰিছে অন্যহাতে একাংশ ব্যৱসায়ৰ পৰা ব্যৱসায়িক প্ৰতিষ্ঠানৰ সন্মুখত পকী শ্লেপ নিৰ্মাণ কৰি দিয়াৰ নামটো ধন লোৱাৰ অভিযোগ উঠিছে৷
অতি হাস্যকৰ ভাৱে মাৰ্ঘেৰিটা মহকুমা প্ৰশাসনেও নাকী লগাব নোৱাৰা একাংশ উদণ্ড বেপাৰীয়ে তেওঁলোকৰ পাচলিৰ সম্ৰাজ্যখন মাজ বাটলৈকে লৈ আনিবলৈও সুবিধা পাইছে কিয়নো তেওঁলোকৰ পিছ ফালে আছে আগ গুৰি নথকা আবৰ্জনাৰে ভৰ পূৰ তথা বিভিন্ন বিজাণুৰে ভৰি থকা এটা নলা৷
এই ন’লা নিৰ্মাণৰ সম্পূৰ্ণ ঠিকা লাভ কৰিছিল গুৱাহাটীৰ “মেচাৰ্চ গঙ্গোত্ৰী এণ্টাৰপ্ৰাইচ“ৰ ভৃগুনাথ শ্বাহ নামৰ এজন ঠিকাদাৰে কিন্তু ৰহস্যজনকভাৱে উক্ত প্ৰকল্পটোৰ ঠিকা কেনেকৈ পৰ্যায়ক্ৰমে আন আন ঠিকাদাৰৰ হাতলৈ গ’ল সেয়াও ৰহস্যজনক৷
ব্যাপক দুৰ্নীতি আৰু অনিয়মৰ আশ্ৰয় লৈ শেহতীয়াকৈ ঠিকাদাৰে আত্মসাৎ কৰিবলৈ চেষ্টা কৰিছে আধৰুৱা কৈ নিৰ্মাণ কৰি থোৱা নলাৰ বিল৷
শেহতীয়াকৈ মাৰ্ঘেৰিটা নগৰ খনৰ জয়ানগৰ অঞ্চলতো আধৰুৱা নলা পুনৰ নিৰ্মাণ কৰি খৰ খেদাকৈ মাৰ্চ মাহৰ ভিতৰতে বিল আত্মসাৎৰ বৃহৎ ফন্দি ইতিমধ্যে আৰম্ভ কৰিছে বুলি গুৰুত্বৰ অভিযোগ উত্থাপন হৈছে৷ অতি পৰিতাপৰ বিষয় যে- ২২ কোটিৰো অধিক টকীয়া ন’লা নিৰ্মাণৰ কামত ঠিকাদাৰে নিম্ন মানদণ্ডৰ সামগ্ৰী যোগান ধৰি চৰকাৰৰ টকা আত্মসাৎ কৰাৰ অভিযোগ উত্থাপন হোৱাৰ পিছতো আজিলৈকে বিভাগীয় ভাৱে কোনো ধৰণৰ তদন্ত নোহোৱাত বিষয়টো অধিক ৰহস্যজনক হৈ পৰিছে৷
একাংশ সচেতন ৰাইজে এইক্ষেত্ৰত কমিছনৰ অংকৰে চৰকাৰী ঠিকাদাৰ আৰু বিষয়াৰ বুজা বুজি হোৱাৰ অভিযোগ কৰিছে৷ নিৰ্মাণৰ আৰম্ভণিতেই দুৰ্নীতি, অনিয়ম হোৱাত দুই এক ছাত্ৰ সংগঠনে মাৰ্ঘেৰিটা মহকুমাধিপতিক সেই সময়ত স্মাৰক পত্ৰ প্ৰদান কৰি এই দুৰ্নীতিৰ তদন্ত কৰিবলৈ দাবী জনাইছিল লগতে উক্ত দুৰ্নীতিৰ লগত মাৰ্ঘেৰিটা নগৰ সমিতি জড়িত আছে বুলিও অভিযোগ কৰি সংবাদমেল দিছিল৷
কিন্তু পৰৱৰ্তী সময়ত সকলো ফুটুকাৰ ফেন হ’ল৷ ছাত্ৰ মুক্তি সংগ্ৰাম সমিতিৰ তিনিচুকীয়া জিলা সমিতিৰ সেই সময়ৰ সম্পাদক পাপু দত্তই সংবাদমাধ্যমৰ আগত আন্দোলন কাৰ্যসূচী পৰ্যন্ত ঘোষণা কৰিও আন্দোলন নকৰাকৈ পৰৰ্বতী সময়ত ৰহস্যজনক ভাৱে সকলো বিষয় মৌন হৈ পৰিল আৰু নলা নিৰ্মাণৰ ঠিকাদাৰে চলায় গ’ল ব্যাপক লুণ্ঠণ৷এই দুৰ্নীতিত বিভাগীয় বিষয়া, মাৰ্ঘেৰিটা নগৰ সমিতিৰ বিষয়াও জড়িত থকাৰ বাবে বিভাগ সমূহে নলা নিৰ্মাণৰ কোনো ধৰণৰ তথ্য দিবলৈ সাহস নকৰে বুলি এটা সূত্ৰই অভিযোগ উত্থাপন কৰিছে৷ অন্যহাতে মাৰ্ঘেৰিটাৰ প্ৰায় সংখ্যক দল সংগঠন নেতাৰ মৌণতাই সমগ্ৰ বিষয়টো অধিক ৰহস্যজনক কৰি তুলিছে বুলি সচেতন মহলত বুবু বাঃ বাঃ চলিছে৷ এইক্ষেত্ৰত বিভাগীয় উচ্চ পৰ্য্যয়ৰ এক তদন্ত দাবী তুলিছে সচেতন মহলে৷ তদন্ত কৰিলে নিশ্চিত ভাৱে বৃহৎ নলা কেলেংকাৰিৰে জড়িত ৰৌ বৰালী জালত পৰা সম্ভাৱনা আছে বুলি সূত্ৰত প্ৰকাশ৷