এক ভয়ংকৰ সৌৰ ধুমুহা আহি আছে। ইয়াৰ ফলত গোটেই বিশ্বৰ ইন্টাৰনেট যোগাযোগ ব্যৱস্থা বিধ্বস্ত হৈ পৰিব পাৰে। এইটো কেই সপ্তাহ বা কেইবামাহৰ বাবেও ঘটিব পাৰে।
বিজ্ঞানৰ পৰিভাষাত যাক কোৱা হয় কৰ’নাল মাছ ইজেকশ্যন(চিএমই)। ই সমগ্ৰ সৌৰমণ্ডলৰ বাবেই বিপজ্জনক হৈ উঠিব পাৰে।
আমেৰিকা যুক্তৰাষ্ট্ৰৰ আৰভিনে কেলিফৰ্ণিয়া বিশ্ববিদ্যালয়ৰ শেহতীয়া এক গৱেষণাত এই আশংকা পোহৰলৈ আহিছে। এই গৱেষণা পত্ৰ যোৱা মঙলবাৰে অনলাইনত প্ৰকাশ পাইছে।
গৱেষকসকলৰ মতে এইবাৰ আহিবলগীয়া সৌৰ ধুমুহাটোৰ দৰে সৌৰধুমুহা ইয়াৰ পূৰ্বে ১৮৫৯ আৰু ১৯২১চনত আহিছিল। অৰ্থাৎ ১০০ বছৰ পাছত পৃথিৱী পুনৰ এক ভয়ংকৰ সৌৰ ধুমুহাৰ সন্মুখীন হ’বলৈ আগবাঢ়িছে।
গৱেষকসকলে জানিবলৈ দিয়া মতে এনেকুৱা ভয়ংকৰ সৌৰ ধুমুহা পৃথিৱীৰ ওপৰত দানৱৰ দৰে সৰি পৰাৰ ঘটনা প্ৰতিটো দশকতে ১.৬শতাংশৰ পৰা ১২ শতাংশ থাকে। এইবাৰ তেনেকুৱা এক সৌৰ ধুমুহাৰ সন্মুখীন হোৱাৰ সম্ভাৱনা অত্যন্ত বেছি।
জানিব পৰা মতে, ১৮৫৯ বা ১৯২১চনৰ দৰে ইমান তীব্ৰ নহ’লেও ১৯৮৯চনৰ মাৰ্চত যি সৌৰ ধুমুহা পৃথিৱীৰ পিনে খহি আহিছিল তাৰ ফলত কানাডাৰ সমগ্ৰ কুইবেক প্ৰদেশ একেৰাহে ৯ঘন্টা আন্ধাৰত ডুব গৈছিল।