ক’ভিড প্ৰতিৰোধী ডিচপ’জেবল ফেচ মাস্কেও কঢ়িয়াই আনিব পাৰে মাৰাত্মক ভাবুকি!
ব্ৰিটেইনৰ ছোৱানছী বিশ্ববিদ্যালয়ৰ (Swansea University) বৈজ্ঞানিকৰ এটা দলে এই কথা প্ৰকাশ কৰিছে।
বিজ্ঞানীসকলৰ এই গৱেষণাটোত কেইবাটাও বিজ্ঞান-প্ৰযুক্তিৰ প্ৰতিষ্ঠান তথা সংস্থা জড়িত হৈ আছে।
বিজ্ঞানীসকলে কৈছে যে যেতিয়া ডিচপজেবল ফেচ মাস্কখন পানীত ডুবোৱা হয়, তেতিয়া মাস্কখনৰ পৰা মাৰাত্মক ৰাসায়নিক পদাৰ্থ বাহিৰ হৈ আহে।
এই ৰাসায়নিক পদাৰ্থসমূহে প্ৰদূষিত কৰে পানীখিনি।
তেওঁলোকৰ গৱেষণাটোত লাভ কৰা তথ্যমতে, মাস্কখনৰ চিলিকন আৰু প্লাষ্টিক ফাইবাৰৰ ভিতৰত থকা এই ৰাসায়নিক পদাৰ্থসমূহ হৈছে- সীহ, এণ্টিমণি আৰু কপাৰ।
গৱেষণাটোৰ নেতৃত্ব লোৱা বিশ্ববিদ্যালয়খনৰ এগৰাকী বিজ্ঞানী ডঃ ছাৰ্পাৰ চাৰ্পে কয় যে মহামাৰিক শেষ কৰিবলৈ সকলোৱে মাস্ক পৰিধান কৰা প্ৰয়োজনীয় যদিও মাস্কসমূহৰ উৎপাদনৰ সম্পৰ্কে অধিক গৱেষণা আৰু নীতি-নিৰ্দেশনাৰো প্ৰয়োজন, যাতে পৰিৱেশ আৰু মানুহৰ স্বাস্থ্যৰ প্ৰতি ই সৃষ্টি কৰা ভাবুকিক হ্ৰাস কৰিব পাৰি।
গৱেষণাটোত কেইবাধৰণৰো ডিচপজেবল মাস্ক পৰীক্ষা কৰি চোৱাৰ পাছত বিজ্ঞানীসকলে এই মত পোষণ কৰিছে।
বিজ্ঞানীসকলে কয় যে মাস্কসমূহত থকা ৰাসায়নিক পদাৰ্থই মানুহৰ শৰীৰত কৰ্কট ৰোগৰো সৃষ্টি কৰিব পাৰে।
এই সম্পৰ্কে বিজ্ঞানীসকলে মাস্ক উৎপাদন কৰোতে সাৱধানতা অৱলম্বন কৰিবলৈ সকীয়াই দিছে।