ছেবাই বুধবাৰে হাইস্কুল শিক্ষান্ত পৰীক্ষাৰ ২০১৯ বৰ্ষৰ ফলাফল ঘোষণা কৰাৰ পাছত পৰীক্ষাত নিজৰ ফলাফলক লৈ সন্তুষ্ট নহোৱা ছাত্ৰ-ছাত্ৰী সকলৰ বাবে এইবাৰ অনলাইন আবেদনৰ যোগে নিজৰ উত্তৰ বহী পৰীক্ষা কৰাৰ সুবিধা প্ৰদান কৰিছে ছেবাই।
আগ্ৰহী ছাত্ৰ-ছাত্ৰী সকলে ছেবাৰ অনলাইন প’ৰ্টেল http://sebaonline.org লৈ গৈ “APPLY FOR RE-CHECKING OR PHOTOCOPY WITH RE-CHECKING OF ANSWER SCRIPTS” লিংকত ক্লিক কৰিব লাগিব। উত্তৰ বহী পুনৰীক্ষণৰ বাবে আবেদন পৰীক্ষাৰ ফলাফল ঘোষণাৰ ১২ দিনৰ ভিতৰত কৰিব লাগিব।
প্ৰতিটো বিষয়ৰ উত্তৰ বহী পুনৰীক্ষণ আবেদনৰ বাবে প্ৰতিখন বিষয়ৰ কৰাণে অনলাইন যোগে ৩৫০ টকা আদায় দিব লাগিব বুলি ছেবাই প্ৰকাশ কৰে।
আনহাতে, ছেবাৰ ফালৰ পৰা প্ৰকাশ কৰা মতে উত্তৰ বহী পুনৰীক্ষণ কৰা মানে পৰীক্ষাৰ উত্তৰ বহী পুনৰ মূল্যাংকন নহয়।
উত্তৰ বহী পুনৰীক্ষণৰ সময়ত মুঠ প্ৰাপ্ত নম্বৰ পুনৰ গণনা কৰিব পৰা যাব, নম্বৰ দিবলৈ পাহৰা প্ৰশ্নোত্তৰ, ভূলকৈ নম্বৰ দিয়া আদি দিশ বোৰ পৰ্যবেক্ষণ কৰিব পৰা যাব।
উত্তৰ বহী পুনৰীক্ষণৰ আবেদন কৰাৰ ৩০ দিনৰ ভিতৰত ছাত্ৰ অথবা ছাত্ৰীগৰাকীয়ে ন’টিফিকেশ্যন যোগে ইয়াৰ বিষয়ে ছেবাৰ তৰফৰ পৰা জনোৱা হ’ব বুলি উল্লেখ কৰা হৈছে। পৰৱৰ্তী সময়ত যদিহে মাৰ্ক শ্বিটত কিবা সলনি হয় প্ৰকৃত মাৰ্কশ্বিট জমা দি নতুন মাৰ্কশ্বিট নিব লাগিব।
আনহাতে, পৰীক্ষাৰ উত্তৰ বহী গুৰুত্বপূৰ্ণ তথ্য হোৱাৰ বাবে ই তথ্য জনাৰ অধিকাৰ আইন-২০০৫ৰ অন্তৰ্ভূক্ত নহয় যদিও ইয়াৰ ফটো ক’পিৰ বাবে আবেদন কৰা ছাত্ৰ-ছাত্ৰী সকলে ইণ্টাৰনেটৰ মাধ্যমেৰে নিজৰ উত্তৰ বহী আৰু পুনৰীক্ষণ কৰাৰ পাছৰ উত্তৰ বহীৰ স্ক্যান ক’পি লাভ কৰিব পাৰিব।উত্তৰ বহীৰ ফটো ক’পি লাভ কৰিবলৈ হ’লে ৫৫০ টকা অনলাইন যোগে আদায় দিব লাগিব।