নতুন বছৰটোৰ প্ৰাক ক্ষণত ৩১ ডিচেম্বৰত দৰং জিলাই লাভ কৰিছে ৰাজ্যৰ বৃহত্তম মুগাসূতা কটা প্ৰকল্প। ৩০ কোটি টকীয়া এই প্ৰকল্পটো স্থাপন কৰা হৈছে দৰঙত থকা চৰকাৰী ৰেচম পামৰ চৌহদত।
Intensive Bivoltine Sericulture Development Project (IBSDP) নামৰ ৩০ কোটি টকীয়া এই প্ৰকল্পটো Under North East Region Textile Promotion Scheme (Assam)ৰ অধীনত গ্ৰহণ কৰা এটা প্ৰকল্প।
দৰং জিলা আৰু ওচৰ-পাঁজৰৰ ৰাইজক অৰ্থনৈতিকভাৱে উপকৃত কৰাৰ সম্ভাৱনা থকা এই প্ৰকল্পটোৰ আধাৰশিলা স্থাপন কৰে মঙলদৈৰ বিধায়ক গুৰুজ্যোতি দাসে।
আধাৰশিলাৰ অনুষ্ঠানটোত বিধায়ক দাসে প্ৰকল্পটো নিৰ্মাণৰ ক্ষেত্ৰত গুণগত মান আৰু কম সময়ৰ ভিতৰত সম্পূৰ্ণ কৰাটো গুৰুত্বপূৰ্ণ বুলি মন্তব্য কৰে।
তেওঁ লগতে আশা কৰে যে সম্পূৰ্ণ হোৱাৰ পিছত প্ৰকল্পটোৱে অঞ্চলটোৰ বৃহৎ সংখ্যক বয়নশিল্পীক অৰ্থনৈতিকভাৱে উপকৃত কৰিব। তেওঁলোকে এতিয়া নুনিপলু বা পাটপলুৰ বাহৰ পৰা খুব কম খৰচত সূতা উৎপাদন কৰিব পাৰিব।
অনুষ্ঠানটোৰ আৰম্ভণিতে দৰঙৰ সহকাৰী ৰেচম সঞ্চালক যোগেশ চন্দ্ৰ তালুকদাৰে প্ৰস্তাৱিত প্ৰকল্পটোৰ এটা চমু আভাস আৰু জিলাখনত ৰেচম উৎপাদনৰ এখন ছবি দাঙি ধৰে।
জিলাখনৰ উপায়ুক্ত ঘনশ্যাম দাস, দৰং জিলা পৰিষদৰ মুখ্য কাৰ্য্যবাহী বিষয়া, মঙলদৈৰ ৰাজহ চক্ৰ বিষয়া আদি বিশিষ্ট লোকসকল উপস্থিত থাকে।
উল্লেখ কৰিব পাৰি যে অসমত ৰেচম উদ্যোগৰ যথেষ্ট সম্ভাৱনা থকা সত্ত্বেও উপযুক্ত আধুনিক আহিলাৰ ব্যৱহাৰ নথকা বাবে পৰম্পৰাগত পদ্ধতিৰে ৰেচম পালকসকলে সূতা উৎপাদন কৰি আহিছে। মাত্ৰ দুই-এখন জিলাতহে বহুমুখী ৰিলিং মেচিনৰ ব্যৱহাৰ কৰা হয়।
