গুৱাহাটী পূব আৰক্ষী জিলাত ১৪৪ ধাৰা জাৰি; অসমৰ আন বহু স্থানত জাৰি কৰাৰ সম্ভাৱনা
এন আৰ চিৰ চূড়ান্ত তালিকা প্ৰকাশ পাবলৈ মাত্ৰ তিনিটা দিন বাকী থকা অৱস্থাত গুৱাহাটী পূব আৰক্ষী জিলাত ১৪৪ ধাৰা জাৰি কৰা হৈছে।
অৱশ্যে গুৱাহাটী পূব আৰক্ষী জিলাৰ আৰক্ষী উপায়ুক্তৰ দ্বাৰা স্বাক্ষৰিত নিৰ্দেশটোত এন আৰ চিৰ সৈতে কোনো সম্পৰ্ক দেখুওৱা হোৱা নাই।
নিৰ্দেশটোত কোৱা হৈছে যে কোনো কোনো লোক বা লোকৰ গোট বা দল-সংগঠন, সংস্থাই গুৱাহাটী পূব আৰক্ষী জিলাৰ বিভিন্ন ঠাইত স্বাভাৱিক পৰিস্থিতি, যেনে- কাৰ্য্যালয় আদিৰ কাম-কাজ, জনসাধাৰণৰ আহ-যাহ, যানবাহনৰ চলাচল আদিত ব্যাঘাত কৰাৰ সম্ভাৱনাই দেখা দিছে।
…আৰু লগতে এই গোট, দল-সংগঠন, ব্যক্তি আদিয়ে আন্দোলন, ধৰ্ণা, শ্ল’গান দিয়াৰ শংকা উৎপন্ন হৈছে, যিবোৰে শান্তি বিঘ্নিত কৰিব পাৰে আৰু জনসাধাৰণৰ স্বাভাৱিক জীৱনযাত্ৰা ব্যাহত কৰিব পাৰে।
এইবোৰ নহ’বৰ বাবে আৰু শান্তিপূৰ্ণ জীৱনযাত্ৰা নিশ্চিত কৰিবৰ বাবে আগতীয়া প্ৰতিৰোধমূলক ব্যৱস্থা হিচাপে এই ধাৰা আৰোপ কৰা হৈছে।
এই আইনৰ অধীনত দিয়া নিৰ্দেশমতে, উক্ত গুৱাহাটী পূব আৰক্ষী জিলাত ৫জনতকৈ অধিক ব্যক্তি একেলগ হ’ব নোৱাৰিব, আন্দোলন, ধৰ্ণা, সমদল আৰু ধ্বনি দিয়া নিষিদ্ধ কৰা হৈছে। এই আৰক্ষী জিলাৰ অন্তৰ্গত হৈ আছে দিচপুৰ, ভঙাগড়, বশিষ্ঠ, হাতীগাওঁ, সোণাপুৰ, আৰু ক্ষেত্ৰী আৰক্ষী থানাৰ অধীনত থকা অঞ্চলবোৰ।
এই নিৰ্দেশ ২৬ আগষ্ট, ২০১৯-ৰ পৰা কাৰ্য্যকৰী হ’ব বুলি নিৰ্দেশটোত কোৱা হৈছে। নিৰ্দেশটো ২৬ আগষ্টত স্বাক্ষৰিত।
অৱশ্যে এই নিৰ্দেশৰ দ্বাৰা ক্ষতিগ্ৰস্ত যিকোনো ব্যক্তিৰে গুৱাহাটী পূব আৰক্ষী জিলাৰ আৰক্ষী উপায়ুক্তৰ সন্মুখত লিখিত ৰূপত নিজৰ আপত্তি দাখিল কৰিবলৈ হক আছে, নিৰ্দেশটোত এইদৰে কোৱা হয়।