ডিমা হাছাও জিলাত উগ্ৰপন্থী সংগঠন আৰু নিৰাপত্তা বাহিনীৰ মাজত হোৱা এক সংঘৰ্ষত এজন উগ্ৰপন্থী নিহত হয়। জানিব পৰা মতে, কালি নিশা এই ভয়ংকৰ গুলীয়াগুলীৰ ঘটনা সংঘটিত হয়।
ডিমা হাছাও আৰক্ষীয়ে নিশ্চিত কৰা মতে, সোমবাৰ (১ ডিচেম্বৰ) য়ে নিশা প্ৰায় ১১ বজাত জিলাখনৰ মাহুৰ আৰক্ষী থানাৰ অন্তৰ্গত দূৰৱৰ্তী জিনামভেলিৰ চিল্লেই গাঁৱত এই সংঘৰ্ষ সংঘটিত হয়। অসম আৰক্ষীৰ কমাণ্ড বেটেলিয়ন আৰু মাৰ পিপলচ কোনভেচন ডেমক্ৰেটিক চুমুকৈ এইচপিচি (ডি) উগ্ৰপন্থী সংগঠনৰ মাজত এই গুলীয়াগুলী চলে।
আৰক্ষীৰ তথ্য অনুসৰি, এইচপিচি (ডি) উগ্ৰপন্থীৰ এটা দলে চিল্লেই গাঁৱত এখন গাড়ী ৰখাই চালকক ভাবুকি দিছিল আৰু শূন্যলৈ দুই ৰাউণ্ড গুলী চলাইছিল। গুলীৰ শব্দ শুনি ওচৰতে থকা কেম্পৰ পৰা অসম আৰক্ষীৰ কমাণ্ড বেটেলিয়নৰ সদস্যসকল ঘটনাস্থলীলৈ ওলাই আহে। লগে লগে উগ্ৰপন্থী দলটোৱে আৰক্ষীক লক্ষ্য কৰি গুলীচালনা আৰম্ভ কৰাত নিৰাপত্তা বাহিনীয়েও সঁহাৰি জনায়।
দীৰ্ঘ সময় ধৰি চলা এই গুলীয়াগুলীত এইচপিচি (ডি) সংগঠনৰ সদস্য মোদী মাৰ ওৰফে মেমো নিহত হয় বুলি ডিমা হাছাও আৰক্ষীয়ে নিশ্চিত কৰিছে। নিহত কেডাৰজন জিনামভেলিৰ বৰো আৰ্কাপ গাঁৱৰ বাসিন্দা আছিল।
সংঘৰ্ষৰ পাছতে নিহত মোদী মাৰৰ মৃতদেহ মৰণোত্তৰ পৰীক্ষাৰ বাবে শিলচৰ চিকিৎসা মহাবিদ্যালয়লৈ প্ৰেৰণ কৰা হৈছে। আৰক্ষীয়ে বৰ্তমান এই সমগ্ৰ ঘটনা সন্দৰ্ভত তদন্ত অব্যাহত ৰাখিছে। তদন্ত শেষ হোৱাৰ পাছত অধিক তথ্য পোহৰলৈ অহাৰ সম্ভাৱনা আছে।
