দিল্লী বিস্ফোৰণ কাণ্ডত এক ডাঙৰ পদক্ষেপ। সন্ত্ৰাসবাদী উমৰ নবিৰ ঘৰটো আই ই ডি বিস্ফোৰণেৰে উৰুৱাই দিয়া হয়। এই সন্ত্ৰাসবাদীয়ে যোৱা ১০ নৱেম্বৰত দিল্লীৰ লালকিল্লাৰ সন্মুখত এখন গাড়ী বিস্ফোৰণ ঘটাইছিল। প্ৰাথমিক তদন্তৰ পৰা অনুমান কৰা হৈছে যে তেওঁ আত্মঘাতী আক্ৰমণ সংঘটিত কৰিছিল। তেওঁৰ ঘৰ আছিল জম্মু-কাশ্মীৰৰ পুলৱামাত। সেইটো উৰুৱাই দিলে নিৰাপত্তা সংস্থাই।
জানিব পৰা মতে, বৃহস্পতিবাৰৰ মাজনিশাৰ পৰা শুকুৰবাৰে পুৱাৰ ভিতৰত কেন্দ্ৰীয় চোৰাংচোৱা সংস্থাই এই ব্যৱস্থা গ্ৰহণ কৰে। প্ৰমাণ পোৱা গৈছে যে লালকিল্লাৰ সন্মুখত যিখন হুণ্ডাই i20 গাড়ীত বিস্ফোৰণ সংঘটিত হৈছিল, সেইখনত আছিল উমৰ। তেওঁৰ ডি এন এ মিলিছে। বৰ্তমানলৈকে এই বিস্ফোৰণত ১৩ জন লোকৰ মৃত্যু হৈছে। আহত হৈছে কমেও ২০জন। ডাঃ উমৰ-উন-নবী কাশ্মীৰৰ পুলৱামাৰ বাসিন্দা আৰু পেছাত চিকিৎসক আছিল।
এই যুৱকজনে আগতে কাশ্মীৰ, হাৰিয়ানা আৰু উত্তৰ প্ৰদেশত ঘূৰি ফুৰিছিল। কিন্তু তেওঁৰ সহযোগী ডাঃ মুজাম্মিল শ্বাকিলক গ্ৰেপ্তাৰ কৰাত তেওঁৰ পৰিকল্পনা বিফল হয়। মুজাম্মিল আল-ফালাহ বিশ্ববিদ্যালয়ৰ অধ্যাপক। তেওঁৰ ঘৰৰ পৰা উদ্ধাৰ হৈছে ৩৬০ কেজি এমোনিয়াম নাইট্ৰেট। অনুমান কৰা হৈছে যে এই গ্ৰেপ্তাৰৰ পিছত উমৰে আতংকিত হৈ বিস্ফোৰক ভৰ্তি গাড়ী এখন লৈ লালকিল্লাৰ সন্মুখত উপস্থিত হৈছিল।
সূত্ৰ অনুসৰি, উমৰ এজন অতি প্ৰতিভাশালী ছাত্ৰ আছিল যদিও বেছিভাগ সময়তে মনে মনে আছিল। ২০২১ চনত ড° শ্বাকিলৰ সৈতে তুৰস্কলৈ গৈছিল। তেতিয়াৰ পৰা তেওঁৰ মতাদৰ্শ সলনি হৈছে। সেই সময়ত তুৰস্কত নিষিদ্ধ জৈছ-ই-মহম্মদৰ কিছুমান নিম্নস্তৰৰ সদস্যৰ সংস্পৰ্শলৈ আহিছিল।
উভতি অহাৰ পিছত উমৰে ক্ৰমান্বয়ে অস্ত্ৰ-শস্ত্ৰ আৰু বোমা নিৰ্মাণৰ সঁজুলি যেনে এমোনিয়াম নাইট্ৰেট, পটাছিয়াম নাইট্ৰেট, চালফাৰ সংগ্ৰহ কৰিবলৈ আৰম্ভ কৰে। তেওঁ সেইবোৰ আল-ফালাহ বিশ্ববিদ্যালয়ত লুকুৱাই ৰাখিছিল। তদন্তকাৰীয়ে সন্দেহ কৰিছে যে উমৰে গাড়ীত স্থাপন কৰিব পৰা বিস্ফোৰক নিৰ্মাণ কৰিছিল। অনলাইনত উপলব্ধ উৎসৰ পৰা কেনেকৈ বনাব পাৰি সেইটো শিকিছিল।
যোৱা ১০ নৱেম্বৰত ফৰিদাবাদ আৰক্ষীয়ে ২৯০০ কিলোগ্ৰাম বিস্ফোৰক উদ্ধাৰ কৰাৰ খবৰ পোহৰলৈ অহাৰ পিছতে উমৰ আতংকিত হৈ পৰা বুলি অনুমান কৰা হৈছে। তাৰ পিছত তেওঁ নিজৰ গাড়ীত উঠি ওলাই আহে। গাড়ীখনত আধা নিৰ্মিত বিস্ফোৰক সামগ্ৰী আছিল। লগতে ইয়াক সঠিকভাৱে ইনষ্টল কৰা হোৱা নাছিল বুলিও খবৰ পোৱা গৈছে।
