৭ জুনৰ পৰা ৰাজ্যত আৰম্ভ হ’ব সামান্য আনলক প্ৰক্ৰিয়া; কি ইংগিত দিলে ৰাজ্যৰ মুখ্যমন্ত্ৰীয়ে?

ৰাজ্যত অহা ৭ জুনৰ পৰা সামান্য আনলক প্ৰক্ৰিয়া আৰম্ভ হোৱাৰ সম্ভাৱনাৰ কথা উল্লেখ কৰে মুখ্যমন্ত্ৰী হিমন্ত বিশ্ব শৰ্মাই।

তেওঁ কয় ‘সামান্য আনলক প্ৰক্ৰিয়া ৭ জুনৰ পৰা সম্ভৱ হ’ব পাৰে, কিন্তু সম্পূৰ্ণ আনলক প্ৰক্ৰিয়া ১৫ জুনৰ ভিতৰত সম্ভৱ নহয়।‘

‘মৃত্যুৰ সংখ্যাৰ ক্ষেত্ৰত প্ৰথম যেতিয়া কোভিড হয় তেতিয়া কেচ ধৰা পৰিলেও মানুহৰ মৃত্যু নহয়। কিন্তু শেষৰ ফালে কোভিড আক্ৰান্তৰ সংখ্যা কমে কিন্তু মৃত্যুৰ সংখ্যা বাঢ়ে।‘ কোভিড আক্ৰান্তৰ মৃত্যুৰ হাৰক লৈ এই মন্তব্য মুখ্যমন্ত্ৰীৰ।

তেওঁ আৰু কয় ‘হাস্পতালত বহু ৰোগীয়ে ১০-১৫ দিন সংগ্ৰাম কৰি থাকে। কোভিড আক্ৰান্ত ৰোগীৰ সংখ্যা যেতিয়া দ্ৰুতগতিত কমি যাব তেতিয়া মৃত্যুৰ সংখ্যাও লাহে লাহে কমি যাব।‘

তাৎপৰ্যপূৰ্ণভাৱে অহা ৫-৬ দিনৰ ভিতৰত কোভিডত আক্ৰান্ত হৈ মৃত্যুৰ সংখ্যা নিম্নগামী হোৱা দেখা যাব বুলি তেওঁ ভৱিষ্যত বাণী কৰে।

তেওঁ লগতে কয় ‘প্ৰতিদিনে অসমত ৬০ হাজাৰকৈ ভেকচিন প্ৰদান কৰি থকা হৈছে। অসমত ৪০ লাখ ভেকচিন লোৱা লোকৰ সংখ্যা অতিক্ৰম কৰিছে। জুলাই মাহত ভেকচিনৰ উৎপাদন দুগুণ হৈ যাব। ডিচেম্বৰৰ ভিতৰত ভাৰতৰ প্ৰতিজন ব্যক্তিয়ে ভেকচিনৰ দুটা ড’জ লাভ কৰিব পাৰিব।‘