ভাৰতীয় জনতা পাৰ্টিৰ এগৰাকী জ্যেষ্ঠ নেতা শংকৰ চন্দ্ৰ দাসৰ বুধবাৰে বিয়লি গুৱাহাটীত চিকিৎসাধীন অৱস্থাত মৃত্যু হয় ৷ মৃত্যুৰ সময়ত তেওঁৰ বয়স হৈছিল ৭৪ বছৰ ৷ নেতাগৰাকীৰ মৃত্যুত সমগ্ৰ বৰনগৰ অঞ্চলত শোকৰ ছাঁ পৰিছে।
বৰনগৰ কলেজৰ অৱসৰপ্ৰাপ্ত অধ্যাপক, প্ৰাক্তন সাংবাদিক তথা বৰপেটা জিলা বিজেপিৰ সভাপতি প্ৰয়াত দাসে যোৱা বিধান সভা নিৰ্বাচনত সৰভোগ সমষ্টিৰ বিজেপি দলৰ প্ৰাৰ্থী হিচাবে অৱতীৰ্ণ হৈ পৰাজিত হৈছিল ৷
কেইদিনমান পূৰ্বে কোভিডত আক্ৰান্ত হোৱাৰ পাছত তেওঁৰ স্বাস্থ্যৰ অৱনতি ঘটাত গুৱাহাটীৰ এখন ব্যক্তিগত চিকিৎসালয়ত চিকিৎসাধীন হৈ আছিল ৷
তেওঁৰ কোভিড ফলাফল নিগেটিভ আহিছিল যদিও শৰীৰত আন আনুষংগিক উপসৰ্গ দেখা দিয়াত তেওঁৰ স্বাস্থ্যৰ অধিক অৱনতি ঘটে আৰু অৱশেষত মৃত্যুৰ ওচৰত হাৰ মানে ৷
১৯৪৭চনত সৰভোগৰ আহোমপথাৰ গাঁৱত জন্মগ্ৰহণ কৰা শংকৰ দাসে কিছুদিন বৰপেটাৰ বাউসী বানীকান্ত মহাবিদ্যালয়ত প্ৰবক্তা হিচাপে কাম কৰাৰ পাছত ১৯৭১চনৰ পৰা বৰনগৰ মহাবিদ্যালয় শিক্ষা বিভাগৰ প্ৰবক্তা হিচাপে কাম কৰি অৱসৰ গ্ৰহণ কৰিছিল।
প্ৰয়াত শংকৰ দাসে অধ্যাপনাৰ উপৰি সাংবাদিকতাও কৰিছিল। ‘হিন্দুস্তান সমাচাৰ’ নিউজ এজেন্সি, ‘নিউজ ষ্টাৰ’, ‘দ্য ছেন্টিনেল’ ‘আজিৰ অসম’ আদি কাকতত সংবাদদাতা হিচাপে সেৱা আগবঢ়াইছিল। তেওঁ ১৯৯০ চনৰ পৰা কেইবাবছৰো বৰনগৰ প্ৰেছ ক্লাবৰ সভাপতি আছিল।
১৯৯৬ চনত ভাৰতীয় জনতা পার্টিৰ প্রাথমিক সদস্য হিচাপে ৰাজনীতিত যোগদান কৰা শংকৰ দাসে ২০১৫ চনৰ ফ্রেব্রুৱাৰিৰ পৰা বৰপেটা জিলা বিজেপিৰ সভাপতিৰ দায়িত্বত আছিল।
বিজেপিৰ এগৰাকী সংগঠক হিচাপে ৰাজ্যখনৰ বিভিন্ন জিলাত দায়িত্ব সম্পাদন কৰা শংকৰ দাস ২০১৮ চনৰ অক্টোবৰ মাহৰ পৰা অসম চৰকাৰৰ APDCL ৰ অধ্যক্ষ ৰূপে নিযুক্ত হৈছিল।
প্ৰয়াত শংকৰ দাসে ২০২১ চনৰ বিধানসভাৰ নিৰ্বাচনত সৰভোগ সমষ্টিৰ বিজেপিৰ প্ৰাৰ্থী হিচাবে অৱতীৰ্ণ হয় যদিও চিপিআইএমৰ প্ৰাৰ্থী মনোৰঞ্জন তালুকদাৰৰ হাতত পৰাজয়বৰণ কৰে ৷
বিজেপিৰ জ্যেষ্ঠ নেতাগৰাকীৰ মৃত্যুত মুখ্যমন্ত্ৰী ডঃ হিমন্ত বিশ্ব শৰ্মা, প্ৰাক্তন মুখ্যমন্ত্ৰী সৰ্বানন্দ সোণোৱাল, বিজেপিৰ ৰাজ্যিক সভাপতি তথা কেবিনেট মন্ত্ৰী ৰনজিৎ কুমাৰ দাস, সৰভোগ সমষ্টিৰ বিধায়ক মনোৰঞ্জন তালুকদাৰকে ধৰি বিভিন্ন নেতা, দল-সংগঠনে গভীৰ শোক প্ৰকাশ কৰিছে ৷
মৃত্যুৰ সময়ত তেওঁ পত্নী প্ৰণতি দাস, পুত্ৰ ভাস্কৰজ্যোতি দাসৰ লগতে বহু গুণমুগ্ধক ইহসংসাৰত এৰি থৈ গৈছে ৷
