অটল বিহাৰী বাজপেয়ীৰ বিয়োগত বিশ্বনাথ চাৰিআলি জ্যেষ্ঠ নাগৰিক সন্থাৰ শোক
ভাৰতৰ প্ৰাক্তন প্ৰধানমন্ত্ৰী, দিকদৰ্শী ৰাষ্ট্ৰনেতা, সু-সাহিত্যিক অটল বিহাৰী বাজপেয়ীৰ বিয়োগত আজি সমগ্ৰ দেশৰ লগতে বিশ্বনাথতো শোকৰ ছাঁ পৰে। প্ৰয়াত ৰাষ্ট্ৰনেতাগৰাকীৰ প্ৰতি গভীৰ শ্ৰদ্ধাঞ্জলি জ্ঞাপন কৰে বিশ্বনাথ চাৰিআলি জ্যেষ্ঠ নাগৰিক সন্থাই।
আজি বিয়লি বিশ্বনাথ চাৰিআলিৰ বীণাপানি নাট্য মন্দিৰত অনুষ্ঠিত এখন শোকসভাত অটল বিহাৰী বাজপায়ীৰ প্ৰতিচ্ছবিত শ্ৰদ্ধাঞ্জলি জ্ঞাপন কৰে জ্যেষ্ঠ নাগৰিক সন্থাৰ সম্পাদক বিজয় গোস্বামী, জ্যেষ্ঠ সদস্য যোগেন শৰ্মা, ঈশ্বৰ ভাগৱতী, পুতুল শৰ্মা আদিয়ে।
জ্যেষ্ঠ নাগৰিক সন্থাৰ সভাপতি ডঃ নিত্যানন্দ গগৈৰ সভাপতিত্বত অনুষ্ঠিত শ্ৰদ্ধাঞ্জলি অনুষ্ঠানত অঞ্চলটোৰ বহু কেইগৰাকী গণ্য-মান্য ব্যক্তিয়ে প্ৰাক্তন প্ৰধান মন্ত্ৰী গৰাকীৰ জীৱন আৰু কৰ্মৰাজিৰ ওপৰত আলোকপাত কৰি বক্তব্য আগবঢ়ায়।
আজি বিশ্বনাথ চাৰিআলিৰ পাভৈ পথৰ আমবাৰীত অটল বিহাৰী বাজপেয়ীৰ প্ৰতি গভীৰ শ্ৰদ্ধাঞ্জলি জনোৱা হয়। তেওঁৰ প্ৰতি শ্ৰদ্ধাঞ্জলি জ্ঞাপন কৰে বিশ্বনাথৰ বিধায়ক প্ৰমোদ বৰঠাকুৰ আৰু অমৰ জ্যোতি বৰঠাকুৰে।
বিশ্বনাথ জিলা ক্ৰীড়া সন্থাৰ বিষয়-ববীয়া আৰু খেলুৱৈসকলে বিশ্বনাথ চাৰিআলি ষ্টেডিয়ামত এখন শোক সভা অনুষ্ঠিত কৰি প্ৰাক্তন প্ৰধান মন্ত্ৰীগৰাকীৰ প্ৰতি গভীৰ শ্ৰদ্ধা প্ৰকাশ কৰে। বিশ্বনাথ চাৰিআলিৰ ই-ৰিক্সা চালকসকলে একত্ৰিত হৈ অনুষ্ঠিত কৰা এখন শোকসভাত স্থানীয় বিধায়ক প্ৰমোদ বৰঠাকুৰ উপস্থিত থকে।
উল্লেখ্য যে বিশ্বনাথ চাৰিআলি প্ৰেছ ক্লাব আৰু বিশ্বনাথ জিলা সাংবাদিক সন্থাই প্ৰাক্তন প্ৰধান মন্ত্ৰীগৰাকীৰ বিদেহী আত্মাৰ সতগতি কামনা কৰি গভীৰ শোক প্ৰকাশ কৰে।
আজি বিশ্বনাথৰ গাঁও-চহৰ সকলোতে প্ৰাক্তন প্ৰধানমন্ত্ৰী গৰাকীৰ প্ৰতি থকা আন্তৰিকতা আৰু শ্ৰদ্ধাৰ স্বতঃস্ফূৰ্ত প্ৰকাশ হোৱা পৰিলক্ষিত হয়।