প্ৰথম পৰ্যায়ৰ নিৰ্বাচনলৈ মাজত মাথো চাৰিটা দিন বাকী থকা অৱস্থাত গৰম হৈ পৰিছে শিৱসাগৰৰ নিৰ্বাচনী বতাহ ।
নিৰ্বাচনত প্ৰতিদ্বন্দ্বিতা আগবঢ়োৱা প্ৰাৰ্থীৰ বিভিন্ন সংবাদ মেলৰ মাজত আজি আমগুৰি সমষ্টিৰ বিধায়ক তথা আগন্তুক নিৰ্বাচনৰ বিজেপি মিত্ৰজোঁটৰ প্ৰাৰ্থী প্ৰদীপ হাজৰিকাৰ বিৰুদ্ধে শোষণ-বঞ্চনাৰ অভিযোগ তুলি শিৱসাগৰ প্ৰেছ ক্লাৱত এক সংবাদ মেল সম্বোধন কৰিলে প্ৰদীপ হাজৰিকাৰ জ্যেষ্ঠ ভাতৃ প্ৰয়াত গগণ হাজৰিকাৰ পত্নী আৰু কন্যাই।
১৯৮৫ চনত বিধায়ক প্ৰদীপ হাজৰিকাৰ জেষ্ঠ ভাতৃ গগণ হাজৰিকাৰ মৃত্যুৰ পাছত কিদৰে প্ৰদীপ হাজৰিকাই বৌৱেক লাৱণ্য হাজৰিকা আৰু তিনি কন্যা সন্তানক মাটি-ভেটি-সম্পত্তিৰ পৰা বিতাড়িত কৰিছিল তাৰ আখ্যান আজিৰ সংবাদ মেলত দাঙি ধৰে প্ৰয়াত গগণ হাজৰিকাৰ পত্নী আৰু কন্যাই ।
বিধায়ক গৰাকীৰ দুই ভতিজা ক্ৰমে পৰিস্মিতা হাজৰিকা আৰু অবিস্মিতা হাজৰিকাই তেওঁলোকৰ পিতৃৰ বিয়োগৰ পিছত গগণ হাজৰিকাৰ মাটি-গাড়ী-হাতী-ঘৰ আদি সকলো সম্পত্তি আত্মহত্যা কৰাৰ অভিযোগ উত্থাপন কৰি এই সমগ্ৰ বিষয়ক লৈ আদালতত গোচৰ চলি থকাৰ তথ্য ৰাজহুৱা কৰে।
প্ৰদীপ হাজৰিকাৰ দুই ভতিজীয়ে তেওঁলোকৰ মাতৃয়ে ন্যায় পাবৰ নিমিত্তে সংবাদ মাধ্যমৰ আগত এইসমূহ তথ্য ৰাজহুৱা কৰা বুলি উল্লেখ কৰি কয় যে এই যুঁজ বিগত বহু দিনৰ পৰাই চলাই অহা হৈছে যদিও প্ৰদীপ হাজৰিকাৰ দৰে শক্তিশালী ব্যক্তিৰ বিৰুদ্ধে ঠিয় দিবৰ বাবে দৰকাৰ হোৱা সকলো প্ৰস্তুতিৰ অন্তত অসমৰ ৰাইজে জনপ্ৰতিনিধিজনৰ প্ৰকৃত স্বৰূপ জনাৰ প্ৰয়োজন বুলিহে আজিৰ সংবাদ মেল আহ্বান কৰা বুলি জানিব দিয়ে।
নিৰ্বাচনৰ প্ৰাকমুহূৰ্তত এনে সংবাদ মেল কিয় অনুষ্ঠিত কৰা হ’ল বুলি সোধা প্ৰশ্নৰ উত্তৰত দুই ভতিজীয়ে কয় যে এয়া কোনো ৰাজনীতি নহয়। কোনোৱে নিজৰ মাতৃক লৈ ৰাজনীতি নকৰে। কিন্তু যিজন ৰাইজৰ প্ৰতিনিধিয়ে নিজৰ প্ৰয়াত জ্যেষ্ঠ ভাতৃৰ পৰিয়ালক এনে শোষণ কৰিব পাৰে তেওঁ ৰাইজক কি কৰিব নোৱাৰিব বুলি প্ৰশ্ন উত্থাপন কৰে।
ইয়াৰ উপৰিও বিধায়কজনৰ দুই ভতিজীয়ে আমগুৰি সমষ্টিৰ ৰাইজক আগন্তুক বিধানসভা নিৰ্বাচনত ভোটদান কৰাৰ সময়ত এই বিধায়কজনৰ কুকাণ্ডসমূহ মনত পেলাবলৈ আহ্বান জনালে।
