কোনো পিষ্টল বা চোকা অস্ত্ৰ নহয়, চাইকেলৰ চেইনেৰে ডিঙিত মেৰিয়াই ইগৰাকীৰ পিছত সিগৰাকী সুন্দৰী মহিলা-যুৱতীক প্ৰথমে বলাৎকাৰ আৰু তাৰ পিছত হত্যা কৰা পশ্চিম বংগৰ ‘চেইন মেন’ হিচাবে কুখ্যাত ছিৰিয়েল কিলাৰ এজনক আদালতে মঙলবাৰে মৃত্যুদণ্ডৰে দণ্ডিত কৰে।
৩৮ বছৰীয়া কামাৰুজ্জ জামান সৰকাৰ নামৰ লোকজনে ঘৰত অকলশৰে থকা মহিলা-যুৱতীক চিকাৰ হিচাবে বাচি লয়।
ঘৰত কোনো নথকাৰ সুযোগলৈ লোকজনে বিদ্যুত বিভাগৰ কৰ্মী বুলি চিনাকি দি ঘৰত প্ৰৱেশ কৰে আৰু অকলশৰীয়া মহিলা-যুৱতীক আক্ৰমণ কৰি ধৰাশায়ী কৰে।
ইয়াৰ পিছত অসহায় মহিলা-যুৱতীক লোকজনে বলাৎকাৰ কৰি ডিঙিত চেইনেৰে মেৰিয়াই হত্যা কৰে।যোৱা বছৰৰ মে’ মাহত লোক জনে পুব বৰ্দ্ধমানত এগৰাকী ১৬ বছৰীয়া কিশোৰীক বলাৎকাৰ কৰি হত্যা কৰিছিল ।
আৰক্ষীয়ে তদন্ত চলাই যোৱা বছৰৰ জুন মাহত লোক জনক গ্ৰেপ্তাৰ কৰিছিল।
‘চেইন কিলাৰ’ কামাৰুজ্জ জামান সৰকাৰৰ বিৰুদ্ধে আৰক্ষীয়ে ৰুজু কৰিছিল ১৫ টা গোচৰ।ইয়াৰে ২টা বলাৎকাৰ,৭টা হত্যা আৰু ৬টা হত্যাৰ চেষ্টা চলোৱাৰ গোচৰ।
উক্ত গোচৰ সমূহৰ ভিত্তিত বৰ্দ্ধমানৰ জিলা আদালতে মঙলবাৰে কামাৰুজ্জ জামান সৰকাৰ নামৰ অপৰাধী জনক মৃত্যুদণ্ডৰে দণ্ডিত কৰে।
‘চেইন কিলাৰ’ কামাৰুজ্জ জামান সৰকাৰক মৃত্যুদণ্ড বিহাত স্বস্তিৰ নিশ্বাস এৰিছে স্থানীয় লোক সকলে।
