কোভিড ভেকচিন শীঘ্ৰেই দেশবাসীৰ হাতত পৰাৰ দিশে।
আৰু হয়তো কিছুদিন পিছতেই কোভিড ভেকচিন দেশৰ সাধাৰণ লোকসকলৰ বাবে বজাৰত মুকলি কৰি দিয়া হ’ব।
কিন্তু কিমান হ’ব পাৰে একোটা কোভিড ভেকচিনৰ দাম?কোভিড ভেকচিন প্ৰস্তুত কৰি থকা ভাৰতৰ প্ৰতিষ্ঠান ছেৰাম ইনষ্টিটিউটে ভাৰত চৰকাৰৰ সৈতে ভেকচিন যোগানৰ এখন চুক্তি কৰিব।
সেই চুক্তিৰ আধাৰতে ছেৰাম ইনষ্টিটিউটে দেশবাসীৰ বাবে মোকলাই দিব ভেকচিন।
ছেৰাম ইনষ্টিটিউটৰ মুখ্য কাৰ্যবাহী বিষয়া আদাৰ পুনাৱালাই প্ৰকাশ কৰা মতে প্ৰতিটো কোভিড ভেকচিনৰ দাম ২৫০ টকাৰ ভিতৰতে সীমাৱদ্ধ ৰখাৰ বাবে তেওঁলোকে চেষ্টা চলাই গৈছে।
তেওঁ লগতে কয় যে ভাৰতত ভেকচিন বিধৰ দাম ১০০০ টকা ধাৰ্য কৰা হ’ব যদিও চৰকাৰে যদি বেছি মাত্ৰাত ভেকচিন কিনে তেন্তে সেই দাম প্ৰায় ২৫০ টকালৈ নামি আহিব। প্ৰথমে ভাৰতৰ বজাৰত মুকলি কৰাৰ পিছতহে ভেকচিন বিদেশলৈ প্ৰেৰণ কৰা হ’ব।
ইপিনে ফাইজাৰ ইণ্ডিয়ায়ো ড্ৰাগছ কন্ট্ৰ’লাৰ জেনেৰেল (ডিজিচিআই)ৰ পৰা ভাৰতত তেওঁলোকে প্ৰস্তুত কৰি উলিওৱা কোভিড ভেকচিনৰ বিক্ৰীৰ বাবে অনুমোদন বিচাৰিছে।
ব্ৰিটেইন আৰু বাহৰেইনৰ পৰা অনুমোদন পোৱাৰ পাছত ফাইজাৰে এইবাৰ ভাৰতৰ পৰাও এই অনুমতি বিচাৰিছে।
বাতৰি অনুসৰি, ২০১৯চনৰ নতুন দৰৱ তথা ক্লিনিকেল ট্ৰায়েল আইন অনুসৰি ভাৰতত তেওঁলোকৰ কোভিড ভেকচিনৰ আমদানি, সৰবৰাহ তথা বিক্ৰীৰ অনুমোদন বিচাৰি ফাইজাৰে আবেদন জনাইছে।
অলপতে, ফাইজাৰ আৰু বায়’এনটেক সংস্থাৰ যৌথ উদ্যোগত প্ৰস্তুত কৰা কোভিড ভেকচিন জৰুৰী অৱস্থাত বিক্ৰীৰ বাবে ব্ৰিটেইনে সাময়িক অনুমোদন দিছে।
বাতৰি মতে, ফাইজাৰে তেওঁলোকৰ কোভিড ভেকচিনৰ বিক্ৰীৰ অনুমোদন বিচাৰি আমেৰিকাকো আবেদন জানইছে।
উল্লেখ্য যে ভাৰতত বৰ্তমান মুঠ পাঁচটা ভেকচিনৰ ট্ৰায়েল চলিছে। ইয়াৰ ভিতৰত ছেৰাম ইনষ্টিটিউটে অক্সফোৰ্ড-এষ্ট্ৰোজেনেকাই প্ৰস্তুত কৰা ভেকচিনৰ ট্ৰায়েলো চলাই আছে।
