ত্ৰিপুৰা ৰাজধানী আগৰতলাৰ পৰা প্ৰায় ৫০ কিলোমিটাৰ দূৰৰ উদয়পুৰত ৰজাৰবাগ নামৰ এটা মটৰ ষ্টেণ্ডত হোৱা বিধ্বংসী অগ্নিকাণ্ডত ষ্টেণ্ডটোত থকা ৭খনকৈ বাছ জাহ যায় আৰু আন কেইবাখনো কম-বেছি পৰিমাণে ক্ষতিগ্ৰস্ত হয়।
ঘটনাটো যোৱা নিশাৰ। নিশা প্ৰায় ১১.১৫ বজাত জুই বিয়পি পৰা সময়ত ষ্টেণ্ডটোত ২০খন বাছ আছিল।
অগ্নিকাণ্ডৰ ঘটনাটো এতিয়াও ৰহস্যৰ আৱৰ্তত যদিও বাছৰ মালিক আৰু কৰ্মচাৰীসকলৰ দাবী, কোনো দুষ্ট লোকে ইচ্ছা কৰি অগ্নি সংযোগ কৰিছে।
স্থানীয় লোকৰ ভাষ্যমতে, তেওঁলোকে জুই দেখাৰ লগে লগে নুমুৱাবৰ চেষ্টা কৰিছিল যদিও সক্ষম নহ’ল।
লগে লগে আৰক্ষী আৰু অগ্নিনিৰ্বাপক বাহিনীক খবৰ দিয়া হয়।
অগ্নিনিৰ্বাপক বাহিনীৰ কেইবাখনো গাড়ী আহি প্ৰায় ৪-৫ ঘণ্টা অক্লান্ত চেষ্টা কৰাৰ পিছত জুই নুমুৱাবলৈ সক্ষম হয়।
উল্লেখ কৰিব পাৰি যে ষ্টেণ্ডত ৰৈ থকা বাছত অগ্নি সংযোগৰ ঘটনাৰ সৈতে লোকচানৰ পৰা হাত সৰা, বীমাৰ ধন আদায় আদিৰ উদ্দেশ্যও নিহিত থাকে যদিও এতিয়ালৈকে তেনে সন্দেহ প্ৰকাশ কৰা নাই আৰক্ষীয়ে।
কেইবছৰ মান পূৰ্বে গুৱাহাটীৰ পল্টন বজাৰস্থিত ভ’ল্ভ বাছ ষ্টেণ্ডত তেনেকুৱা এটা ঘটনা ঘটিছিল, য’ত আস্থানটোত থকা কেইবাখনো বাছ ভস্মীভূত হৈছিল।
